Hargeysa(Dawan)-Wasiirka Wasaaradda Arimaha Gudaha Jamhuuriyadda Somaliland Md. Maxamed Kaahin Axmed, ayaa furay shir lagu samaynayo Qorshaha Horuumarinta Shanta Sanno ee Degmooyinka Dalka 2023-2027 Axadda,kaasoo sidoo kale lagu shaaciyey shan degmo oo sanadkan ku biiraya mashruuca JPLG-ga.
Kulankan Waxaa ka soo qayb galay Maayarrada Magaalooyinka Hargeysa, Burco, Berbera, Ceerigaabo,Laascaanood,Sheekh, Boorama, Gebilay, Baligubadle, Baki, Lughaya, Saylac, Oodweyne iyo Salaxley.
Shirkan ayaa ujeedadiisu ahayd falanqeynta iyo Unkida Qorshaha Horuumarinta Shanta Sanno ee Degmooyinka Dalka 2023-2027, waxaana intii uu socday si wayn looggaga dooday Siyaasadda iyo Samaynta Qorshaha Horuumarinta ee 2023-2027.
Waxaa madashan ka hadlay Agaasimaha Waaxda Maamulka Gobollada iyo Dawladaha Hoose Maxamed Cali Maxamed, oo ka waramay muhiimada kulankan iyo ujeedada laga leeyahay mustaqbalka,isaga oo si qoto dheer uga waramay sida looga faa’iidaystay mashruuca JPLG,kaasoo shaqeeya Degmooyinka Dalka.
Sidoo kale waxaa iyana goobta ha hadlay Maayirka Caasimada Hargeysa Cabdikariim Axmed Mooge oo ku hadlayey afka Maayarada Dalka,sidoo kale waxaa isna goobta ka hadlay Maayirka Magaalada laascaanood oo lagu ammaanay dedaal iyo horuumar uu sameeyey mudadii uu xilka hayey.
Waxa kale kulanka ka hadlay Gudoomiyaha Gobolka Sool Cabdikariim Aadan Xaaji Diiriye, madax ka socotey Hay’adda UNDP iyo Agaasimayaasha Guud ee Wasaaradaha Qorshaynta Qaranka, Degaanka iyo Isbedelka Cimilada, kuwaasoo sharaxaad ka bixiyey ahmiyadda uu leeyahay qorshuhu iyo faa’idada uu qaranka u leeyahay.
Wasiirka Wasaaradda Arimaha Gudaha JSL Maxamed Kaahin Axmed oo shirkaasi furay ayaa ka waramay horuumarka uu leeyahay Mashruuca JPLG iyo sida looga faa’iidaystay meelihii laga hirgeliyey iyo Degmooyinka laga hirgelinayo Mashruuca JPLG sanadkan soo socda oo ay ka mid yihiin Degmooyinka Ceelafwayn, Gar-adag, Taleex, Xudun, Dhahar iyo Badhan.
Wasiir Kaahin ayaa sharaxay doorka ay dawladdaha hoose ku leeyihiin arrimaha maamulka dawliga ah “Dawladaha hoose waa meesha laga Maamulo Shacabka sidaa daraadeed waa in ay Shacabka barraan Dawladnimada”ayuu yidhi
Waxaanu isagoo hadalka sii wada shaaciyey degmooyinka sanadka gelaya mashruuca JPLG-ga “Degmooyinka ku soo biiraya Mashruuca JPLG, sanadkan soo socda waxaa ka mid ah Ceelafwayn, Taleex, Badhan, Gar-adag iyo Dahar” ayuu yidhi Wasiirka Wasaaradda Arimaha Gudaha JSL Maxamed Kaahin Axmed.