Rasuulka Allah (scw) wuxuu yidhi: “ Cibaado waxa ugu fadli badan: farajka oo la sugo” Waxa weriyay Tarmadi.
Carabtuna waxay tidhi: “ Xadhigu markuu adkaado, ugu danbaysta wuu go’aa”, oo loola jeedo, arimuhu marka ay adkaadaan waxaad sugtaa waa farajkii iyo albaabka furma. Dhib ka ugu khatar badan ee qof ku dhacaa, wax kale maaha ee waa isagoo male xun naftiisa ka maleysta.
Ma maqashaa kelmadahan soo socda: “Ma Awoodo, ma Karayo, xitaa hadaan sidaa yeelo waan qaldamayaa, ama waan Fashilmayaa”.
Kelmadahaasi waxay ka khatar badanyihiin dagaal tooska ah oo hub iyo rasaas la isku adeegsado. Isku dey inaad warqad iyo qalin soo qaadato ka dibna aad qorto wax kasta oo aad hore u tidhi ma awoodo, kuna hoos qortid waan awoodaa; naftaadana ku kalsoonow.
Nin xakiim ah ayaa yidhi “ Arrin kasta wuxu ku bilowdaa yaraan, ka dibna wuu koraa oo weynaada ilaa Masiibada mooyee. Iyadu waxay ku bilaabantaa weynaan ka dibna way yaraataa”. Shay kastaana marka uu bato wuu jabaa oo rakhiis noqdaa , edebta mooyee, iyadu way qaaliyowdaa”. Guushuna waa go’aanka saxda ah, sabirka iyo joogtaynta.