Ugu yaraan 14 qof ayaa ku dhimatay tiro kalena waa ay ku dhaawacmeen kadib markii boodh weyn uu soo dumay xilli ay dabeylo lama filaan ah ku dhufatay magaalada Mumbai ee dalka Hindiya.
Boodhkan oo cabbirkiisu dhan yahay 70m iyo 50m sida ay booliisku sheegeen ayaa ku dhacay guryo iyo kaalin shidaal oo ku taal magaalada Isniintii.
Gurmadka deg degga ah ayaa sheegay in dad yar ay wali ku hoos jiraan, waxaana socda gurmad.
Dowladda gobolka Maharashtra, oo ah halka ay ku taallo Mumbai, ayaa amartay in baadhitaan lagu sameeyo dhacdada.
Muuqaalo laga soo duubay kanaalada wararka maxaliga ah ayaa muujinaya boodhka wayn dabayshu lulayso ka hor inta aanu ku dhicin dhismayaasha u dhow wado mashquul badan oo ku taal duleedka bari ee magaalada Ghatkopar. Dhowr baabuur ayaa shilkaasi ku burburay.
Sawirro laga soo qaaday goobta, kooxaha gurmadka ayaa lagu arkayaa iyaga oo ka shaqeynaya burburka. Muuqaal muuqaal ah oo cajiib ah ayaa muujinaya shaqaalaha samatabbixinta oo dhibban ka soo saaraya boorarka soo dhacay hoostiisa oo isticmaalaya qalab koronto ah si ay u gooyaan birta.
“Waxaan soo badbaadinay ku dhawaad 80 qof si nabad ah,” ayuu sarkaal u sheegay wakaalada wararka ee ANI. “Waxaa jira hal baabuur oo cas oo burbur xooggan soo gaaray, waxaan ka shakisannahay inay jiraan dad ku go’doonsan.”
Akshay Vasant Patil, waa 20-jir ka shaqeeya adeegga xawilaadaha, waxaana uu ku sugayay kaalin shidaal markii ay duufaantu dhacday.
“Waxaan xaqiiqsaday in boodhka xayaysiiska uu soo dhacayo, waxaana isku dayay inaan kaga baxo oo ordo, laakiin waxaan ku dhex xayiray baabuurta,” ayuu yidhi.
“Sideed ilaa sagaal qof, oo aan ku jiro, ayaa u suurtagashay in ay baxsadaan.”
Balse Mr Patil ayaa arkay dad kale oo badan oo ku xayiran gawaadhi iyo baabuur hoostooda boodhka burburay.
Dadka ay waxyeeladu soo gaadhay waxaa ka mid ah Bharat, oo 24 jir ah, kaas oo ku sii jeeday goobtiisa shaqada markii uu roobku billowday.
War qoraal ah oo lagu daabacay X, oo hore u ahaan jiray Twitter, mas’uuliyiinta madaniga ah ee Mumbai ayaa sheegay in “dabaylo degdeg ah” ay sababeen burburka iyo dhowr wakaaladood, oo ay ku jiraan booliiska, dab-damiska iyo kooxaha ka jawaabista
Duufaanta siigada ah ee Isniintii ayaa keentay in qeybo ka mid ah magaalada ay joogsato, iyada oo jeexjeexday geedaha, taas oo sababtay qaska safarka iyo korontadii.
Duulimaadyo dhowr ah ayaa si ku meel gaadh ah loo hakiyay ama loo weeciyay garoonka caalamiga ah ee magaalada, sida ay sheegtay warbaahinta gudaha.
Mumbai waa mid ka mid ah magaalooyin dhowr ah oo Hindiya ku yaal oo u nugul fatahaadaha daran iyo dhacdooyinka roobka la xidhiidha inta lagu jiro xilliga monsoon – oo badanaa u dhexeeya bilaha Juun iyo Sebtembar.