Qore Boqore Axmed Cabdi
Hargaysa (Dawan) Madaxweynaha la doortey ee Jamhuuriyada Somaliland, Mudane Cabdiraxmaan Maxamed Cabdillaahi Cirro ayaa shalay booqasho iyo duco ugu tagay madaxweyne ku xigeenkii hore ee Somaliland Muj Xassan Ciise Jaamac.
Mujaahid Xassan Ciise Jaamac ayaa u jiifa xaalad caafimaad, waxaana la filayaa in dhawaan dhakhtar dibadeed loo qaado, si loo la tacaalo xaaladda caafimaad ee madaxwayne ku xigeenkii hore ee Somaliland.
Madaxweynaha la doortey ayaa ILLAAHAY uga baryey inuu xanuunka ka kor qaado, caafimaad taam ahna siiyo, isla markaana waxa uu u cadeeyey in maanta Qarankiisu garab taagan yahay , xaaladiisa caafimaad.
Mujaahid Xassan Ciise Jaamac ayaa madaxweynaha la doortey uga mahadnaqey booqashadiisa , waxaana uu ILLAAHEY uga baryey in xilka dhawaan loo doortey EEBE ku garab galo una fududeeyo masuuliyada culus ee bulshada u dooratay.
Geesta kale Madaxwaynaha la doortay ee Somaliland Cabdiraxmaan Maxamed Cabdilaahi Cirro ayaa qaabiley gudoomiye ku xigeenkii labaad ee golaha Wakiillada Cali Yuusuf oo booqasho, salaam iyo duco ugu yimi madaxwaynaha.