Hindiya iyo New Zealand ayaa dib u bilaabay wadahadalada ganacsiga xorta ah toban sano ka dib markii wada xaajoodyadu burbureen, iyada oo Ra’iisul Wasaaraha Zealand Christopher Luxon uu bilaabay safar shan maalmood ah oo uu Delhi ku yimi halkaas oo uu wadahadalo laba geesood ah la yeeshay Ra’iisul Wasaare Narendra Modi.
Labada dhinac ayaa ku heshiiyey in bisha soo socota la bilaabo wareegii koowaad ee wada xaajoodka.
Ku dhawaaqistan ayaa ah horumar weyn oo laga gaadhay xidhiidhka dhaqaale ee labada dal, ayuu yidhi Luxon. “Hindiya waxa ay awood muhiim ah u leedahay New Zealand waxayna door muhiim ah ka ciyaari doontaa in la labanlaabo Dhoofinta New Zealand qiimo ahaan 10ka sano ee soo socda,” Luxon ayaa yidhi.
Ganacsigan laba geesoodka ah ee u dhexeeya labada dal ayaa lagu qiimeeyaa wax ka yar $2bn (£1.55bn) hadda. Luxon waa hadal muhiim ah ka jeediyey shirka juquraafiyeedka ee ka socda Delhi, kaas oo sidoo kale uu ka soo qaybgeli doono Agaasimaha Sirdoonka Qaranka ee Maraykanka, Tulsi Gabbard.
Ka sokow ganacsiga, New Zealand waxay sheegtay inay sii xoojinayso la shaqaynteeda Hindiya oo dhan sida difaaca, amniga, ciyaaraha iyo deegaanka, iyada oo intaa ku dartay in xidhiidhka dhaqaale ee Delhi uu yahay “mudnaan muhiim ah”.
Labada hogaamiye ayaa kala saxeexday heshiis iskaashi oo dhanka difaaca ah oo lagu xoojinayo amniga badda waxayna sheegeen in ay sahmin doonaan wada shaqeyn ballaadhan oo dhanka lacagaha dijitaalka ah.
16kii Maarso, wakiilada shanta indhood ee isbahaysi sirdoon wadaaga oo ay ka kooban yihiin New Zealand oo ay weheliyaan Australia, Canada, UK iyo US – ayaa ka qayb galay shir ay isugu yimaadeen madaxda sirdoonka iyo amniga oo uu marti galiyay Lataliyaha Amniga Qaranka India Ajit Doval oo ka dhacay Delhi.
U dhawaanshaha New Zealand ayaa muhiim u ah danaha Delhi, maadaama Hindiya ay hiigsaneyso inay ka hortagto Shiinaha oo ku sugan gobolka Badweynta Hindiya.
Luxon ayaa lagu soo waramayaa in uu la socdo mid ka mid ah wafdigii ugu ballaadhnaa ee uu ra’iisul wasaare la safro, taas oo muujineysa muhiimadda ay leedahay booqashada.
Wada-xaajoodyada ganacsi ee u dhexeeya labada waddan ayaa billowday markii hore 2010-kii balse hakad ku yimid kaddib dhowr wareeg oo arrimo ay ka mid yihiin gelitaanka suuqa.
New Zealand waxa ay raadisay galaangal weyn oo ay ku galaan suuqa caanaha Hindiya, kaas oo Hindiya ay dhaqan ahaan u ilaalin jirtay si ay u taageerto beeralaydeeda.
Ka dib sanado badan oo shaki laga qabay ganacsiga xorta ah, India ayaa dhawaanahan aad u furfurantay inay heshiisyo laba geesood ah la gasho wadamada kale.
Dhanka Delhi, wada-hadalladan ganacsi waxay u qaateen muhiimad cusub oo ku aaddan dhabarka go’aanka madaxweynaha Mareykanka Donald Trump uu ku soo rogayo tit-for-tat alaabada laga keeno dalal, oo ay ku jirto Hindiya. Kuwaas waxa la filayaa inay dhaqan galaan 2da Abriil.