Peter Magyar ayaa loo dhaariyay inuu noqdo ra’iisul wasaaraha cusub ee Hungary, ku dhowaad bil ka dib doorashadii baarlamaanka ee soo afjartay 16-kii sano ee uu xukunka hayay Viktor Orban. Magyar, oo 45 jir ah, oo hoggaamiya xisbiga Tisza ee midigta dhexe, ayaa ballanqaadya isbeddelo ka dib sannado badan oo uu dhaqaale xumo ku jiray dalku xilligii Orban, wuxuuna xumaaday xidhiidhkii uu la lahaa xulafada muhiimka ah, oo ay ku jirto Midowga Yurub.
Sabtidii, Magyar wuxuu ku casuumay dadka reer Hungary albaabka isbeddelka nidaamka. Xisbigiisu wuxuu helay aqlabiyad baarlamaani ah oo aad u badan, isaga oo ku guuleystay 141 ka mid ah tirada kuraasida baarlamaanka oo dhan 199-ka kursi.
Si kastaba ha ahaatee, Magyar wuxuu wajahayaa dhowr caqabadood oo ku saabsan doorkiisa cusub, oo ay ku jiraan soo celinta xidhiidhka Budapest ee Midowga Yurub, soo nooleynta dhaqaalaha iyo wax ka qabashada hoos u dhac miisaaniyadeed oo gaadhay ku dhawaad saddex meelood meel bartilmaameedka sanadka oo dhan bisha Abriil.
Xaflad ayaa lagu qabtay gudaha dhismaha baarlamaanka neo-Gothic ee Hungary iyada oo Magyar la dhaariyay. Calanka Midowga Yurub, oo hore looga saaray Baarlamaaka xilligii Orban, ayaa markii ugu horreysay lagu soo bandhigay gudaha aqalka muddo 12 sano ah.
Afhayeenka cusub ee baarlamaanka, Agnes Forsthoffer, ayaa go’aankeedii ugu horreeyay ee xafiiska ku gaadhay ku amartay in calanka dib loo soo celiyo, iyada oo tallaabada ku tilmaantay “tallaabadii ugu horreysay ee calaamad u ah “waddadan dib ugu noqday Yurub”.
Ra’iisul wasaaraha cusub wuxuu higsanayaa inuu heshiis la galo Midowga Yurub kaas oo furi doona qiyaastii $20 bilyan oo maalgelin ah oo la xayiray. Lacagta waxaa la xayiray walaac laga qabo in xuquuqda aadanaha ay sii xumaanayso xilligii Orban iyo hoos u dhaca ku yimid sharciga.
Intii uu xilka hayay Orban, Hungary waxay ka sii fogaatay Midowga Yurub iyada oo xidhiidhka Moscow uu sii xoogaysanayay. Ra’iisul wasaarihii hore wuxuu isticmaalay diidmada qayaxan ee Golaha Yurub si uu uga soo horjeedo cunaqabataynta Ruushka iyo inuu joojiyo taageerada Ukraine.
Soo bixitaanka Magyar ee ra’iisul wasaare ayaa si weyn loogu arkaa guul cajiib ah. Si weyn looma aqoon siyaasadda Hungary ilaa horraantii 2024, markaas oo uu ku lug yeeshay khilaaf dadweyne oo uu la galay xisbiga talada haya ee Fidesz ee Orban.