Hargaysa (Dawan): Wasiirka Warfaafinta, Dhaqanka iyo Wacyigelinta ee Somaliland C/laahi Maxamed Daahir (Cukuse), ayaa shalay xafiiskiisa kulan la yeeshay masuuliyiinta madbacadaha gaarka loo leeyahay ee ka hawlgala magaaladda Hargeysa.
Wasiirka oo hadal u jeediyay masuuliyiintii kulankaasi ka soo qayb galay, waxa uu sheegay in ujeedada kulankani ahayd sidii ay uga wada hadli lahaayeen madbacadaha qorshihii ay ku wada shaqayn lahaayeen sanadka 2015 ee fooda inagu soo haya, isla markaana wax looga waydiin lahaa xeerka saxaafada ee golaha wakiilada horyaala.
Isaga oo ka hadlayay u jeedadda kulankaasi uu la yeeshay madbacadaha waxa uu yidhi “Kulankan ujeedadiisa ugu muhiinsani waxay tahay in aynu isku wargelino sanadka cusub ee 2015 qorshaha aynu ku wada shaqaynayno, waanad og-tihiin oo madbacaduhu waa qayb ka mid ah saxaafadda oo soo saarta wargeysyadda aad daabacdaan, xayaysiis ayaad samaysaan oo dhamaantood ah kuwo la fidinayo oo la baahinayo ah, markaa sababtaas ayaa isku keen keentay.”
Wasiirka warfaafintu, waxa uu tilmaamay inay lama huraan ah in madbacadaha daabaca wargeysyada in ay kala tashadaan xeerka saxaafadda ee horyaala golaha wakiiladda.
waxaana uu yidhi “Waad og-tihiin oo golaha wakiiladu waxa uu gacanta ku hayaa xeerkii saxaafadda oo dib u habayn lagu samaynayo markaa xeerka saxaafada ee dib u habaynta lagu samaynayo qaybta warbaahinta ee uu khuseeyo la tashigii iyo qolooyinkii la waydiinayay waa lagala xidhiidhay, waxna way ku dhiman yihiin oo waa la bixin doonaa, idinka qaybtiina ayaan u baahanahay in aanu talo idinka waydiino”.
C/laahi Maxamed Daahir (Cukuse), waxa kale oo uu tilmaamay in ay muhiim tahay in ay madbacaduhu yeeshaan ay ku shaqaynayaan. “Dawladu waxay xaq idinku leedahay in cashuur bixisaan, waxaana ugu muhiimsan in marka hore liisasn yeelataan, liisankaa ad leedihiin aad ku shaqaysaan oo sanadkii aad ku bixisaan cashuur liisankaa aad ku shaqaynaysaana madbacaduhuna dalka faa’iido ayay u leeyihiin” ayuu yidhi wasiirku.
By: Khadar M. Dhako
Dawannews Hargeysa office
