Hargeysa (DAWAN)- Wasiirka Wasaarada Gaashaandhiga Somaliland Axmed Xaaji Cali (Cadami) ayaa shaaca ka qaaday inay dawladdu ku hawlan tahay qorshe la xidhiidha sidii gacanta loogu soo dhigi lahaa gacan ku dhiiglihii dilay labadii sarkaal ee ka tirsanaa guutadda 1-aad ee ciidanka qaranka.
Axmed Xaaji Cali Cadami oo shalay warbaahinta kula hadlayay magaalada Hargeysa ayaa waxa uu sheegay in xukuumadu ku hawlan tahay in sidii gacanta loogu soo dhigi lahaa gacan ku dhiiglihii labada sarkaal ee guutadda 17-aad ee ciidanka qaranka ku dilay deegaanka Qurlugud, waxaana uu tilmaamay in dhacdadaasi ugub ku ahayd dalka.
“Saraakiishii dhintay ALLE ha u naxariisto, gacan ku dhiiglihiina cirka haddii uu u baxo waa la soo qabanayaa oo dalalka jaarka ayaa lagu maqan-yahay, dalka gudihiisana waa laga raadinayaa. Waayo waa gacan ku dhiigle, waana nin raba inuu taariikhda ciidanka qaranka taariikh madow geliyo,”ayuu yidhi Wasiir Cadami.
Wasiir Cadami oo hadalkiisa sii watay waxa uu yidhi “Dhacdadii naxdinta lahayd ee 18 bishan aynu ku jirno ka dhacday deegaanka Qori-lugud oo ugub ku ahayd taariikhda Somaliland iyo ciidamadeeda, waxaanay ahayd lamo filaan, waxay ahayd mid naxdin leh, Laakiin in siyaasad aan galino may ahayn dhacdadaas foosha xumi.”
Axmed Xaaji Cali Cadami waxa uu tilmaamay in madaxweyne Siilaanyo tacsidii ugu horaysay u diray labadaas sarkaal eheladoodii iyo shacabka Somaliland ee ay ka baxeen sarkiishaasi, waxana uu yidhi “Waxaana halkan ka cadaynayaa in tacsidii ugu horaysay uu bixiyay madaxweynaha Somaliland, iyadoo uu soo saaray afhayeenkii madaxtooyaddu markaas yaan arrinta loo dhigin fikirkii gaabnaa ee reernimadda.”