Hargaysa (Dawan): Xildhibaan Axmed Maxamed Diiriye (nacnac), oo ah mudane ka tirsan golaha Wakiiladda ee Somaliland ayaa ka jawaabay hadal ka soo yeedhay xildhibaan Siciid Cilmi Roobe, oo isna isla golahaasi Wakiiladda ka tirsan oo ay ka soo yeedheen hadallo deel-qaaf ah oo aan ku habboonayn karaamadiisa Xildhibaanimo ka dib markii uu ku baaqay in qori caaradii lagaga hortago oo lagu ridko xukuumadda madaxweyne Siilaanyo.
Xildhibaanka oo shalay la hadlay qaar ka mid ah warbaahitna, waxa uu ku dooday in xukuumadda ka dhalatay xisbiga Kulmiye ay ka dhabaysay wax-qabadkii uu xisbiga Kulmiye balan qaaday, isla markaana ay xukuumaddu wax-qabad balaadhan ku tallaabsatay. Waxa kale oo uu tilmaamay xildhibaan Axmed Maxamed Diiriye (nacnac), in Siciid Cilmi Rooble oo hore uga tirsanaa xisbiga Kulmiye uu ka baxay.
“Waxaanu leenahay xildhibaan Siciid Cilmi Rooble, ha dhaco Siilaanyo, dawladu ha dhacdo, af-ka Siciid Cilmi Rooble ku dhici maayo Siilaanyo, dawladuna ku dhici mayso. Wax-qabad muuqda qofkii qaban waayay ee wadaniyadiisa muujin waaya ayaa ku dhacaya, wax-qabadkii waanu oofinay, haddii aanu Kulmiye nahay, isagu Kulmiye yahan aad ku sheegaysaan ma aha beri hore ayuu ka baxay Kulmiye, waxaanu leenahay haddii aanu Kulmiye nahay, dadku qiimayn haku sameeyaan wax-qadka aanu samaynay” ayuu yidhi xildhibaan Nacnac. Dhinaca kale Axmed Maxamed Diiriye (nacnac), ayaa u soo jeediyay xisbiyadda mucaaridka ah in aanay siyaasadaynin dilka labadaasi sarkaal, waxaanu ku tilmaamay labadaasi sarkaal ee geeriyooday in ay la mid yihiin mujaahidiintii hore ee dalka u soo dhintay. Isaga oo arrimahaasi ka hadlayayna waxa uu yidhi “Waxaan leeyahay ayaan la siyaasadaynin dilka labadaasi sarkaal, oo xisbiyadda mucaaridka ahi ayaanay siyaasadaynin, ee laba mujaahid oo inaga baxay oo kuweenii hore oo kale ayay inoola mid yihiin, ee taa hala ogaado. Waxaanu leenahay waanu ka xun-nahay in dilka labadaasi sarkaal la siyaasadeeyay, oo qaar kale ay inagaga sii dhinteen waanu ka xun-nahay, oo aad iyo aad ayaanu uga xun-nahay. Dadka reer Gabiley waa dadkeenii, waa dadkii tan iyo tii horeba dhaliyay, markaa ma doonayno in siyaasad lagu baabiiyo”.
Sidoo kale Xildhibaan Nacnac, ayaa tacsi u diray qoyskii, qaraabaddii, ciidamadda qaranka Somaliland iyo guud ahaanba shacabka reer Somaliland ee ay ka baxeen labaddii sarkaal ee dhawaan lagu dilay tuuladda Qori-lugud ee gobolka Togdheer, waxaanu labaddii marxuum illaahay uga baryay in uu naxariistii jano ka waraabiyo eheladiisiina samir iyo iimaan ka siiyo, waxaanu yidhi “Waxaan tacsiyadaynayaa labaddii sarkaal ee inaga baxay, qabiil kama bixin, qolana kama bixin, ee Somaliland oo dhan ayay ka baxeen, illaahay samir iyo iimaan ha inaga siiyo, iyagana janadiisa Fardawsa haka waraabiyo. Gacantii ka gar-darnayd ee dishayna waxaanu Illaahay ka baryaynaa in aanu soo qabano, oo waajibkiisa la mariyo.”