Hargaysa (Dawan): Masuuliyiin sar sare iyo siyaasiyiin xilal ka hayay xisbiga mucaaridka ah ee WADDANI iyo taageereyaashoodii ayaa ku dhawaaqay in ay ka baxeen xisbigaasi, isla markaana ay si rasmi ah ugu biireen xisbiga muxaafidka ah ee Kulmiye.
Sidaasina waxa ay xubnahani kaga dhawaaqeen munaasibad balaadhan oo lagu soo dhaweynayay xubnahan ka soo digo rogtay xisbiga Waddani ee ku soo biiray Kulmiye oo shalay lagu qabtay Huteelka Crown ee magaalada Hargeysa, waxaana xubnahaasi ka baxay WADDANI eek u soo biiray KULMIYE ka mid ahaa guddoomiyihii gobolka Maroodi jeex ee xisbiga Waddani, guddoomiye ku xigeenkii iyo guddoomiyihii garabka dhallinyarada iyo sidoo kale boqolaal taageereyaal ah oo iyaga la socday.
Waxaana munaasibadaasi ka soo qayb galay guddoomiyaha xisbiga Kulmiye Muuse Biixi Cabdi, guddoomiye ku xigeenka koowaad ee xisbigaasi Maxamed Kaahin Axmed, guddoomiye ku xigeenka labaad ee Kulmiye Maxamed Xaaji Yuusuf Waabeeyo, guddoomiyaha golaha dhexe ee xisbiga Kulmiye, Wasiiro, xildhibaano ka tiran golaha Wakiiladda iyo sidoo kale taageereyaashii la socday masuuliyiinta ka soo goostay xisbiga WADDANI.
Guddoomiyaha xisbiga muxaafidka ee Kulmiye Muuse Biixi Cabdi oo xafladaasi soo dahweynta ah hadal ak jeediyay waxa uu tilmaamay in xunahan ku soo biiray xisbiga Kulmiye ay noqon doonaan xubno ka mid ah xisbigaas, isla markaana aan cidi ka sheegan doonin. Muuse Biixi Cabdi waxa uu xusay in xisbiga Kulmiye uu ka dhaxeeyo dhamaan shacabka reer Somaliland, isla markaana ay ku wadda jiraan.
Guddoomiye ku xigeenka koowaad ee xisbiga Kulmiye Maxamed Kaahin Axmed, oo isna halkaasi ka hadlay ayaa waxa uu sheegay in xisbiga Kulmiye aan la kala lahayn, isla markaana masuulka imika soo gala iyo kii hore u joogay isku xuquuq ku leeyihiin xisbiga Kulmiye dhexdiisa. Maxamed Kaahin Axmed waxa uu sheegay oo kale in uu xisbiga Kulmiye uu dhamaanba fuliyay balanqaadyadiisii xilligii uu mucaaridka ahaa, waxana uu tilmaamay in xisbiyada mucaaridku ku fashilmeen inay umadda u soo bandhigaan barnaamij siyaasadeed oo ay dadka ku kasbanayaan.
Sidoo kale waxaa isna halkaasi hadal ka jeediyay Guddoomiyaha golaha dhexe ee xisbiga Kulmiye Jaamac Ismaaciil Cige (jaamac-shabeel), oo ugu baaqay xisbiyadda mucaaridka inaanay wakhtiga iskaga lumin muddo kordhin loo sameeyo, xukuumadda, waxaana uu tilmaamay inay bililiqaysan doonaan xisbiyada mucaaridka.
Guddoomiyihii gobolka Maroodi Jeex ee xisbiga mucaaridka ee Waddani Shiine Maxamed Idiris oo isna halkaasi ka hadlay waxa uu tilmaamay in labada xisbi mucaarid ee Waddani iyo UCID ay jabiyeen xeer LN. 14 isla markaana xisbiga Kulmiye ku fadhiyo xeer axsaabta iyo mucaarida.
Shiine Maxamed Idiris, oo arrimahaasi ka hadlayayna waxa uu yidhi “Waxaan cadaynayaa in aan ku soo wareegay xisbiga Kulmiye iska casilay guddoomiyihii gobolka Maroodi Jeex gudidii fulinta iyo golihii dhexe ee xisbiga Waddani, sababta aan ku jeclaaday xisbigan Kulmiye ee aan ugu soo biiray waxa weeye xisbiyadu xeerar ayay leeyihiin. Markaan u fiirsaday saddexda xisbi sharcigooda waxaan arkay in xisbiga kulmiye ee ku fadhiyo xeer 14 oo ah xeerka axsaabta iyo ururada, sababahaana waan cadaynayaa oo shirweyne u dhexeeyaa oo gole dhexe laska samaystaa ma jirto.
Shirweyne ka dhexeeya oo gudi fulineed iyo hogaan laska samaystaa ma jirto, waxaanan leeyahay labada xisbi ee mucaaridka waa in aad ilaalisaadn xeer 14.”
Sidoo kale waxa halkaasi ka hadlay guddoomiye ku xigeenkii gobolka Maroodi Jeex ee xisbiga Waddani iyo guddoomiyihii garabka dhallinyarada ee Waddani waxay sheegeen inay taageeradooda la garab istaagi doonaan xisbiga Kulmiye ee ay ku soo biireen.
By: Khadar M. Dhako