Berbera (Dawan):-Madaxweynaha Somaliland Md. Axmed Maxamed Maxamuud (Siilaanyo) ayaa shalay tababar heerkiisu sareeyo ugu soo gabo-gabeeyay cutub ka tirsan ciidammadda ilaaladda xeebaha markab dagaal oo ciidammadda Ingiriisku leeyihiin oo la yidhaahdo CARDIGAN BAY dushiisa. Ciidamadaasi oo tababar lagu siiyay naakhuudenimadda doonyaha dagaalka iyo guud ahaan ilaalada xeebaha oo ay bixinayeen sarkiil British ah oo saarnaa markabkaasi.
Tababarkan oo socday muddo laba toddobaad ah waa markii saddexaad ee ciidammadda badaha ee Ingiriisku ay siiyaan ciidammadda xeebaha Somaliland, waxaana madaxweynaha kala qeyb galay xafladaasi Wasiirrada Arrimaha dibadda, madaxtooyadda, marwadda koowaad, maamulka gobolka Saaxil iyo ka degmadda Berbera, Taliyeyaasha ciidammadda qalabka sida. Waxa dawladda Ingiriiskana ka socday saraakiil ka tirsan ciidammadda xeebaha iyo danjiraha u qaabilsan Somaliland iyo Soomaaliya oo isagu shalay socdaal ku yimid Hargeysa. Madaxweyne Axmed Siilaanyo oo qado sharaf loogu sameeyay markabkaas dushiisa ayaa waxaa halkaasi ku soo dhaweeyay safiirka dalka Ingiriiska u qaabilsan dalalka Somaliland iyo Soomaaliya ee fadhigiisu yahay magaalada Nayroobi ee dalka Kenya Ambassador Neil Wigan.
Madaxweynaha Somaliland oo halkaasi ka hadlay ayaa ugu mahad-naqay dawladda Ingiriiska tababarkan ay siiyeen ciidanka ilaalada xeebaha Somaliland, waxaanu tilmaamay in cilaaqaad wanaagsani ka dhaxeeyo Somaliland iyo Ingiriiska. Isaga oo arrimahaasi ka hadlayayna waxa uu yidhi “Waxaan uga mahadnaqaynaa madaxda markabkan iyo sSafiirka i tababarka ay siiyaan ciidankeena ilaalinta nabadgalyo ee xeebaha. Cilaaqaad wanaagsan ayaa naga dhexeeya Ingiriiska iyo taariikh badan oo ina dhex taalla, waxaanu jecel-nahay in xidhiidhkaasi sii kordho oo sii waynaado maalinba maalinta ka danbaysa uu sii kordho oo wax-tar weyn inoo noqon kara, labada dhinac ee Somaliland iyo Ingiriiska, waxaanan rajaynayaa inuu noqdo tababarkani kii wax inoo tara. Mar kale waxaan mahadnaq balaadhan ujeedinayaa madaxda markabkan iyo safaaradda Ingiriiska, waxaanan leeyahay soo dhawaadda.”
Dhinaca kale, Taliyaha ciidanka ilaadda xeebaha ee Somaliland Admiral Axmed Aw Cismaan oo isna halkaasi ka hadlay ayaa madaxweynaha warbixin ka siiyay xaaladda guud ee ciidanka ilaaladda xeebaha iyo tababarkan ay qaateen ciidamaddani, waxaanu yidhi “Muddane Madaxweyne waxa farxad weyn noo ah maanta (shalay) ciidanka ilaalada xeebaha ahaan in aad nagala soo qaybgashid xidhitaanka tababarada sanadlaha ah ee ay ina siiyaan ciidamadda ka tirsan dalka Ingiriiska ee Royal Marines-ka loo yaqaano, ee saaran markab la yidhaahdo Cardigan Bay, waa sanadkii saddexaad ee tababar ina siiyaan, waa tababarro madaxweyne kula kowsaday oo aan kaa horaynin oo ku yimid siyaasadda xukuumiga ah ee ku waajahan dhismaha ciidanka ilaaladda xeebaha, aad baanad ugu mahadsan tahay munaasibaddan aad nagala soo qayb gashay.”
Geesta kalena waxa isaguna halkaasi ka hadlay Danjiraha Ingiriiska u qaabilsan Somaliland iyo Soomaaliya Neil Wigan oo sheegay inay dawladiisu sii joogtaynayso dhaqaalaha ay ku taageerto Somaliland isla markaana ay ka go’an tahay in Somaliland iyo Ingiriisku ay mar walba kor u sii qaadaan iskaashiga iyo wax-wada qabsiga u dhaxeeya.
By: Khadar M. Dhako
Dawannews Hargeysa office
Home Wararka Dalka Madaxweyne Siilaanyo Oo Markab Dagaal Ku Soo Dul Gabo-gabeeyay Tababarkii Saddexaad Ee...