Hargaysa (DAwan): Hal qof ayaan raq iyo ruux toona lahayn meel uu jaan iyo cidhib dhigay halka mid kalena laga badbaadiyay ka dib markii uu Daad la tegay gaadhigii ay wateen dooxa Dacar Budhuq ee barriga Hargaysa.
sida uu warbaahinta u xaqiijiyay madaxa xogta caafimaadka ee wasaaradda caafimaadka Somaliland C/laahi Cabdi Yuusuf.
Gaadhigan oo ahaa sida la sheegay nooca loo yaqaan Land cruiser oo ay wateen labadan nin oo isku qoys ahaa ayaa sida la soo weriyay baabuurkii ay wateen waxa uu ka galay dooxa Dacar-budhuq oo xiligaasi ay biyo badani ka rogmanayeen.
Waxaana daadkaasi laga soo badbaadiyay Axmed Xuseen Samatar, halka aan ilaa hadda raq iyo ruux midnaba lahaynin Nuux Ismaaciil Samatar, oo ahaa wadihii gaadhigaasi uu daadku la tegay, isla markaana la sheegay in ay ilma-adeer ahaayeen ninka kale ee la soo bad-baadiyay.
Ninkan la soo badbaadiyay ayaa la sheegay in lagu daawaynayo cisbitaalka degmadda Abdaal, iyada oo halkaasi lagaga daawaynayo dhaawacyo kala duwan oo ay soo gaadhsiiyeen biyaha daadka ee qaaday.
Dooxa Dacar-budhuq iyo sidoo kale dooxyadda kala duwan ee dalka ayaa inta badan sababa khasaare iskugu jira mood iyo nool xiliyadda ay roobabku da’aan ee uu daadku soo rogmaddo.
waxaana inta badan eeda arrintaasi ama masuuliyadeedda dusha loo saaraa wadeyaasha baabuurta oo aan xil iska saarin badbaadinta nafaha ay sidaan, isla markaana ay ka joogsadaan xiliyada ay dooxyadda biyaha aadka u weyni marayaan.
By: Khadar M. Dhako
