Hargaysa (Dawan): Wasiir ku xieenka Wasaaradda Warfaafinta Dhaqanka iyo Wacyigelinta Somaliland ahna ku simaha wasiirka C/waaxid C/qaadir C/raxmaan ayaa sheegay in aan loo baahnayn in warbaahinta dalka ka hawlgasha inay tebiyaan waxyaabo lidi ku ah xasiloonida iyo qaranimada Somaliland.
Waxaanu u soo jeediyay warbaahinta inay ummadda u soo bandhigaan barnaamijyo warar ku tacaluqa waxyaabaha ay bulshadu ku midaysan tahay ee arrimaha bulshada. Hase yeeshee aanay ku mashquulin arrimaha siyaasadda oo qudha.
Wasiir ku xigeenka warfaafinta wax auu sidan ka sheegay hadal uu ka jeediyay tababar uu shalay suxufiyiin ka kala socda qaybaha kala duwan ee warbaahinta uga furay Huteel Guuleed ee magaalada Hargeysa, kaasi oo ay soo qabanqaabisay Akaadamiga Nabadda iyo horumarka Somaliland. Kaasi oo lagaga hadlayo mudada uu socon doono isku xidhka bulshada iyo warbaahinta.
isagoo arrimahaasi ka hadlayayna waxa uu yidh “Saxaafadeenu waxay u badan tahay oo ay muhiimada siisa arrimaha siyaasada, waxaanad arkaysaa in dhacdooyinka la soo gudbiyo iyo dhamaan waxay u baddan yihiin in arrimaha siyaasada laga hadlo taasi umadeena kala qaybsanaan ayay ku keenaysaa oo siyaasiyiintii nin waliba dan ayuu leeyahay afkaartoodii ayaa kala duwan xisbiga jira umadduna way la kala safan yihiin, laakiin warbaahinteenu looma baahna inay noqdaan kuwo falanqeeya waxa bulshadu ku midaysan tahay.”
Waxaanu intaasi ku daray “Haday tahay horumarka dalka, waxa aynu ognahay in tahriibku batay, ma jiraan waxyaabo ku saabsan in tahriibka laga wacyigeliyo dhalinayradeena oo warbaahinta soo tabiso, dhaxanta dhacaysa waxa jira dhallinyaro dhaxantu ku helayso, waxay cunaan maysan haysan, hoy haysan warbaahinteenu ma yahay kuwo umadda ku soo jeediyay sidii wax loogu qaban lahaa oo bulshadu iskaga kashan lahayd sidii wax loogu qaban lahaa dadka dhibaataysan” ayuu yidhi wasiir ku xigeenku.
Waxa kale oo uu tilmaamay in aan loo baahnayn inwarbaahintu tebiso waxyaabo lid ku ah nabadgalyada iyo qaranimada Somaliland. waxana uu yidhi “Arrimaha nabadgalyada wax ka taraan warbaahinteenu, mise oday meel ka hadlay ayaa umada loo soo gudbiayaa wixii uu ka hadlay, kaas oo nabadgalyada iyo qaranimada khalkhal galinaya soo looma baahna in la yidhaahdo ninii nabadgalyada waxyeelaya meel ha looga soo wada jeesto mise isaga siyaasada laga dayayaa oo xukuumada ha lagu xumeeyo, ha lagaga faa’iidaysto soo may ahayn qofkaas oo kale ilayn qaranimadii iyo nabadgalyadii hadyanu wayno saxaafadna shaqayn mayso nabadna la heli maayo.”
By: Khadar M. Dhako
Dawannews Hargeysa office
