Hargeysa(Dawan):- Wasiirka Wasaaradda Maaliyadda Somaliland Cabdicasiis Maxamed Samaale,ayaa kormeer shaqo oo kadis ah shalay ku tegay Kastamada Magaalooyinka Abaarso iyo Kalabaydh.
Wasiir Cabdicasiis Maxamed Samaale waxaa uu soo kormeeray sida ay u socoto shaqada dakhli ururinta ee labada Kastam waxaanu halkaas kulamo kala yeeshay masuuliiinta Wasaaradda ee Kastamadda Kalabaydh iyo Abaarso.
Ugu horrayn waxaa Wasiirku waxaa uu warbixin ka dhegaystay Maamulaha Kastamka Kalabaydh oo ka warbixiyay mudadii uu joogay waxa u qabsoomay.“Anigu waxaan ahay maamulaha kastamka Kalabaydh muddo sanad ah ayaan joogay marka la isku eego xisaab xidhkii sanadkii hore iyo ka sanadkan waxaa noo kordhay lacag aad u faro badan.marka ay wakhtigeeda gaadhana wasiirka ayaa soo bandhigi doona laakiin waxaa kaliya ee aan idiin sheegayaa ugu yaraan miisaaniyaddu waxay noo korodhay 100/40. Waxaanan idiin sheegayaa waanu isku duubanahay guud ahaan shaqaalahayagu wax naga xumina ma jiraan waana guul balaadhan oo aanu ku tallaabsanay intii ay Xukuumadda Madaxweyne Siilaanyo Jirtay waana tallaabo wanaagsan oo aanu ku ammaanayno Wasiirka Maaliyadda iyo Masuuliyiinta kale ee Wasaaradda Maaliyadda oo aanay la’aantood waxba noo suura galeen,”ayuu yidhi Maamulaha Kastamka Kalabaydh Cabdiraxmaan Cabdilaahi.
Wasiir Cabdicasiis Samaalle oo isna ka hadlay ujeedada kormeerka uu shalay ku soo maray Kastamyada Kalabaydh iyo Abaarso, waxaanu yidhi “Waxaan u mahad naqayaa Maamulaha Kastamka kalabadh iyo shaqaalihiisa oo aan leeyahay hawl wanaagsan ayaad qabateen inkasta oo ay maalin Jimce ah tahay oo fasax lagu gudo jiro haddana wasaarad maaliyad ahaan innagu waynu shaqaynaa,waxaanan kormeeraynay oo aanu ogaanaynay sida ay shaqadu u socoto ee ay u bilaabantay iyadoo sanadkii cusbaa uu bilawday oo maanta(shalay) uu laba yahay,waxaanan ku faraxsan nahay sida wanaagsan ee ay shaqadu u socoto haddii ay kastamada tahay iyo haddii ay cashuuraha Berigga tahay-ba si wanaagsan ayaanay u socotaa dakhli ururinta dalku.”
Wasiirku waxaa kale oo uu kula dardaarmay shaqaalaha Kastamyada dalka in ay si wanaagsan oo soo dhaweyn badani ku jirto ugu adeegaan dadka macaamiisha ah ee loogu adeego Kastamada, waxaanu ugu dambayn u mahad naqay guud ahaan gacastasada loogu adeego Kastamyada dalka gaar ahaan Ganacsatada Qaadka.
“Waxaan kula dardaarmayaa dhammaan maamuleyaasha iyo shaqaalaha Kastamadda dalka in ay aad u soo dhaweeyaan macaamiisha loogu adeego Kastamada iyo guud isla markaana ay ugu dedaalaan in ay si dhakhso ah ugu cashuuraan alaabooyinka kala duwan ee ay ganacsatadu sitaan si aan ugu habsaamin kastamada,waxaa kale oo aan halkan uga mahad celinayaa ganacsatada qaadka oo si wanaagsan isaga bixiya casuuraha dalka,”ayuu yidhi Wasiirku.
Faysal Xiis Weerar(Afgaab)
Dawannews Hargeysa office
