Hargeysa(Dawan):- Wasiirka Wasaaradda Gaashaandhigga Somaliland Axmed Xaaji Cali Cadami,ayaa waxba kama jiraan ku tilmaamay eedayn Maamul Goboleedka Garoowe Somaliland ugu jeediyay Markab hub siday oo lagu qabtay dekeda Berbera, kaas oo Maamulka Puntland sheegay in loo wado kooxda Argagixisada caalamku u aqoonsaday ee Al-Shabaab.
Wasiirka Gaashaandhigga Somaliland waxaa kale oo uu sheegay in Markabku siday hub sharci darro ah dawlad ahaanna Somaliland ay xaq u leedahaday in ay qabato Markabkaa hubka siday sharcigana la tiigsato.
Waxaanu intaa raaciyay Wasiir Cadami in Hubka iyo Markabkaba la haynayo isla markaana ay marinayaan sharciga caalamka uga yaalla hubka sharci darrada ah ee badaha laga gudbiyo,waxaanu sidaa ku sheegay waraysi gaar ah oo uu xalay khadka tilifoonka ku siiyay Wargeyska DAWWAN
Wasiir Cadami oo aanu waydiinay waxay kaga jawaabayaan eeda Puntland dusha ka saartay, waxaanu yidhi “Horta dawlad waliba waxay xaq u leedahay in ay qabato wax kasta oo sifo sharci darro ah dalkeeda ku soo mara, hubkanna Somaliland baa qabatay waanan sheegnay in aanu gacanta ku hayno sabab ninka Garoowe joogaa uu u yidhaahdo hubkaa ciddaasaa loo wadaa waxay ila tahay waa hadal la iska yidhi,. Annaga (Somaliland) ayaa hubkaa hayna meel loo wado ama imika la geynayaana ma jirto waa hub sharci darro ah oo aanu qabanay sharcigaana la marinayaa,ninkaa Masuulka sheeganaya ee Puntland u hadlayna wuxuu ku kacay iyo hadalka uu yidhi xataa haddii col la yahay maaha in beenta intaa leeg la iska sheego, waxaanan leeyahay tuugu isagu isma xado ee dadka kale ayuu xadaa Somaliland-na waxay qabatay tuug markaa haddii ay Puntland tuugo tahay iyaday u taallaa Caalamka ay doonayaan in ay wax u sheegaanna wuu na kala yaqaanaa cidda ay nala xidhiidhinayaan kaayaga u dhaw anaga(Somaliland) iyo Puntland.
Caalamkuna wuu ogyahay Somaliland siday uga qayb qaadato nabad gelyada mandaqada aanu ku naallo oo iska hawlo badan iyo guud ahaan nabad gelyada caalamkaba. hubka aanu qabanayna imika cidna werwer kuma hayo dawlad jaarkeeda iyo dawladaha dariskuba ka ammaan helaan ayaanu nahay oo shaniyo labaatan sanadood nabad ku dhisan Caalamkana kula macaamisha wax nin iska hadlay uu yidhina dal loo maqlayo ma nihin hubkaasina wuxuu wax yeelo gaysan lahaa isagoo aan la qaban kol haddii aan la ogayn cid leh oo loo wadayna waa waajib nasaaran inaanu na dhaafin hubkaas iyo Markabka sidayba sharcigana la soo taago, Maxkamad ayaanan saaraynaa Markabkaasi.”
“Horta sii dayni ma jirto sababtoo ah waxaa Markabkan lagu hayaa ee uu sidaa waa hub sharci darro ah caalamkuna shuruuc buu leeyahay markaa sharciga caalamka ee gudbinta hubka sharci darrada ah ayaanu marinaynaa, kol haddii aanay ku jirin waxyaabaha maana feestada rarka uu sido aanay ku jirin lana garanayn meel loo wado iyo dawlad leh midnaba markaa wax la sii daynayaa ma jirto, Markabkana ciidanb aa saaran oo ilaalinaya mana goosan karo wuxuu sharcigu mariyo ayuun baanan kula dhaqmaynaa oo kaliya,”ayuu ku dooday Wasiirka Gaashaan-dhigu.
Mar aanu waydiinay Wasiirka inay jiraan wali cid la soo xidhiidhay Somaliland oo sheegatay hubka Markabku siday ayaa ku jawaabay. “Horta ma jirto cid ku dhiiran karta in ay tidhaahdo hubka annaga naloo waday, laakiin waxaa jira niman sheegay inay wakiilo u yihiin Markabka oo uu ka mid yahay shirkad Maraakiibta ah oo ka diiwaan gashan dalka Suudaan taa lafteedana baadhitaan ayaanu ku wadnaa in shirkad weyn oo jirta in ay tahay iyo in ay shirkad tuugo ah tahay oo ka ganacsata waxyaabaha kootarabaanka ah waxaana imika la waraysanayaa oo baadhitaan ku socdaa Kabtankii Markabka,Markabkanina wuxuu la mid yahay kii la odhan jiray Sonkor cune ee Berbera Sonkorta keenay kaasoo Sonkortii uu Berbera u siday si suuq madaw ah meelo kale uga soo iibiyay Berberana wax yar keenay oo halkaa lagu xidhay kuna daxalaystay oo aakhirkii iskaraab noqday kanna waa mid wax tuugo ah oo waliba khatar ku ah nabad gelyada caalamka sida laakiin waxaa guul noo ah in hubkaa aanu gacanta ku dhignay kana hor tagnay khatartii uu ammaanka caalamka ku noqon lahaa.”
Faysal Xiis Weerar(Afgaab)
Dawannews Hargeysa office
