Hargaysa (Dawan): Xildhibaan C/raxmaan C/qaadir Qawdhan oo ka mid ah mudaneyaasha Golaha Guurtida Somaliland ayaa si adag uga jawaabay hadalkii ka soo yeedhay guddoomiyaha golaha Wakiiladda ahna guddoomiyaha xisbiga Waddani C/raxmaan Ciro ee uu ku sheegayay in la kala dirro xukuumadda iyo Golaha Wakiilada haddii ay doorashadu wakhtigeedii dib uga dhacdo.
Waxaanu sheegay in talaabo sharciga waafaqsan laga qaadi doono cidii ku kacda falal wax loogu dhimayo qaranimada Somaliland, isagoo tilmaamay in aanu guddoomiye Ciro diyaar u ahayn inuu noqdo murashax madaxweyne.
Xildhibaan Qawdhaan oo shalay u waramayay DAWAN, isagoo arrimahaasi ka hadlayayna waxa uu yidhi “Haddii ay muuqato in xilligan doorasho qabsoomayn waddoooyinkaynu mari jirnay ayuun baynu maraynaa, wax alaale iyo waxay kaga duwan tahay inuu muddo kordhin loo sameeyo xukuumadda Madaxweyne Siilaanyo muddo kordhiyooyinkii hore ma jirto, waxaanay iila muuqataa in muddo kordhintu tahay wax suurto-gal ah, waayo wax diyaarsan ayaan jirin.
Madaxweyne Siilaanyona waxa uu wax dheer yahay waa madaxweyne halgankii magic ku lahaa oo hogaamiye ka ahaa, xaq u leh in loo kordhiyo mudada horena umaddu u dooratay imikana doorashada nasiibkiisa ka qaadaya. Sidaa darteed waxa haboon in muddo kordhin kooban la sameeyo, dhakhsana loo diyaariyo imkaaniyaadkii doorashooyinka”.
Mudane Qawdhan waxa uu tilmaamay in aanu C/raxmaan Cirro doonaynin inuu noqdo murashax madaxweyne, maadaama oo uu iska casili waayay xilka guddoomiyaha golaha Wakiiladda.
“Guddoomiye Ciro waxa la filayay inuu iska casilo xilka Guddoomiyaha golaha Wakiiladda sidaas ayaana u qurux badnayd, waxaana uu kursiga guddoomiyaha wakiiladda ku fadhiyaa muddo shan sano ah, muddo kordhin oo hadda sii dhamaanaysa malaha madaxweynenimo ma doonayo oo wuxuu jeclaysanayaa inuu halkiisa sii fadhiyo.”
Xildhibaan C/raxmaan Qawdhan waxa kale oo uu sheegay in dalku leeyahay dastuur isla markaana tiigsan doono sharciga cidii ku kacda talaabo wax loogu dhimayo qaranimada Somaliland, waxaana uu yidhi “Annigu ma fahmayo dadkan leh lama kordhin karo, way iska hadlayaan dalku wuxuu leeyahay nidaam sharci iyo dastuur, kaasi ayaa ina kala hagaya nidaamkii dawladnimo ayaa dhisan cidii ku gafta dalka maxkamadaha ayaa la marin doonaa, waxaana weeyi ninkii muddane ah ama xisbi ah xaq waxa loogu leeyahay in maxkamad la geeyo haduu dastuurka jabiyo, xisbina waan haysanayaa, dastuurkana ogolaan maayo isma qabanayso, waana ina sharciga la ixtiraamo.”
Waxa kale oo uu ka hadlay mudane Qawdhan hadal dhawaan ka soo yeedhay xildhibaan Ibraahim Mahdi Buubaa, kaas oo uu hanjabay Golaha Guurtida. “Waxaan jaraa’idka ku arkayay nin muddane ah oo leh Guurtida waa in meesha laga dareeriyo, wuu khaldan yahay waxaan leeyahay dastuurka ha jabinina, waxaana la leeyahay adeerkii ayaa Soomaali weyn ah, malaha adeerkii ayuu u shaqaynayaa, markuu leeyahay Golaha Guurtidu jiri maayo haddii uu muddo kordhin sameeyo saw ma aha Somaliland jiri mayso. dastuurka ayaanad ku tahay xildhibaan oo aad dadka kaga duwan tahay, waxaanan ku leeyahay meel ka dhaca dalka ka daaya iyo dastuurka dadkuna Xamar iyo Soomaali weyn ayay kugu xamanayaan is cadee, golahana fadhiy maysid hadaad Soomaali weyn tahay” ayuu yidhi xildhibaan Qawdhan.
Sidoo kale Xildhibaan Qawdhan waxa uu dastuur jabin ku tilmaaamy hadalkii ka soo yeedhay xisbiyada mucaaradka ee ay ku sheegayeen inay samayn doonaan dawlad ku meel gaadh ah marka la gaadho 26 June ee sanadkan.
Waxaanu yidhi “Waxaan leeyahay arrinkaasi waa gef weligeed-ba dawlad wadaag ah lama dhisin maalintii aanu lahayn waxba ayaan loo kordhin Daahir Riyaale, Faysal Cali Waraabe waa kii nagu diidanaa ee laaha Saleebaan ayaa meesha loo dhibayaa oo Siilaanyo iyo Saleebaan waxay ku wada socdaan waa ilma adeer way isku dhiibanayaan, markaa maantana waa qayral dastuur waxa ay sheegayaan.”
By: Khadar Maxamuud Cismaan
Dawannews Hargeysa office
