London (Dawan):- Musharaxa jagadda madaxweynaha ee Xisbiga UCID Jamaal Cali Xuseen, ayaa shalay kulan kula yeeshay magaaladda London xafiiska Arrimaha Dibadda iyo Barwaaqo Sooranka u qaabilsan boqortooyada Ingriiska.
“Saddex qoddob ayaanu kala soo hadalnay, Qodobka koowaad oo ah doorashooyinka Somaliland iyo sidii Dawladda Ingiriisku inooga taageeri lahayd Jadwalkooda iyo waxa laga qaban karayo si aan doorashadu mar kale dib ugu dhicin. Arrinta labaad ee aanu kala hadalnay waxay ahayd Arrinta xaaladda dalka Yemen ka taagan, waxaanu waydiinay sidii Qaxoontiga faraha badan ee Yemen ka imanaya Caalamku inooga caawin lahaa. Waxaanay noo sheegeen in aanay weli wax codsi ah ka hayn dawladda Somaliland laakiin, markay codsi ka helaan ay doorkooda ka qaadan doonaan,”ayuu yidhi Jamaal Cali Xuseen, waxaanu intaas dabo-dhigay “Qodobka saddexaad ee aanu kala hadalnay xafiiska Arrimaha Dibadda iyo Barwaaqo Sooranka u qaabilsan boqortooyada Ingriiska. wuxuu ahaa in Ingiriisku innaga taageero xagga Caafimaadka oo dhakhaatiirta iyo Barnaamijyadda xagga horumarinta Caafimaadka ay qayb ka qaataan, oo ay imikaba ka qeybqaataan sii xoojiyaan.” Kulankaasi waxaa ku wehelinayay Jamaal Cali Xuseen Xoghayaha kalluumaysiga iyo Khayraadka Badda ee xisbiga UCID, Xoghayaha Arrimaha Qoyska Marwo Kaltuun Cumar iyo Xoghayaha Maal gashiga iyo Baayacmushtariga iyo Xubno kale oo ka tirsan xisbiga UCID.
Dawannews Hargeysa office