Hargeysa (Dawan)- Isu-duwaha Qaybta Dhimirka ee Cusbitaalka Guud ee Hargeysa Dr. Mustafe Xuseen Xirsi, ayaa sheegay in cusbitaalka dhimirka caawimadiisa ay qurbo-joogu kaga fiican yihiin dadka gudaha dalka jooga, waxaannu ugu baaqay in ay ka qayb-qataan shacabka guduhu daboolida baahida qaybta dhimirka ee Cusbitaalka Guud ee Hargeysa.
Dr. Mustafe, xafiiskiisa ugu waramay oo shalay Wargeyska Dawan, waxa uu sheegay in cusbitaalka dhimirka Hargaysa lagu sameeyay horumar ballaadhan oo dhinacyo kala duwan leh, sida dhismaha, qaybaha dadka xanuunsanaya lagu daweeyo, lana keenay dhakhaatiir.
“Baahiyaha aasaasiga ah ee cisbitaalka ka jira, waxa naga caawiya cisbitaalka guud, qurba- joogta NGO-yada madaxabanaan sida Gavo. Waxa aan leeyahay waxa soo xusuusta Cusbitaalka Dhimirka oo u dhaama dadka dalka gudihiisa jooga kuwa dalka dibadiisa jooga, waxaanan si gaar ah ugu mahadnaqaya labada hablood ee Haboon iyo Nasteexo oo aad iyo aad noola dadaala oo wax kasta oo cisbitaallka ka dhamaadda noo keena, iyo dawlada hoose oo iyadu na siisa bishii shan iyo sodon neef oo Adhiya,” ayuu yidhi Dr. Mustafe Xuseen.
Dr. Mustafe Xuseen Xirsi waxa uu sheegay in horumaro ballaadhan oo dhinacyo kala duwan ah lagu sameeyey Qaybta Dhimirka ee Cusbitaalka Guud, isagoo ka hadlay sida shaqadu u socoto iyo maalmaha ay ummadda u shaqeeyaan, waxaannu yidhi; “Cisbitaalka waxaa lagu sameeyay horumar aad u ballaadhan, taasoo ay keentay dedaal farro badan oo la geliyay cisbitaalka iyo shaqaalaha cisbitaalka ka shaqeeya. Haddii ay tababar noqoto, haddii ay is-xilqaan la is-xilqaamayo noqoto, shaqaalaha iyo dhakhaatiirta cisbitaalkaba. Cisbitaalku dadka reer Hargaysa oo qudha uma furna, ee waxaa looga yimaadaa gobollada dalka oo dhan iyo dalalka aynu jaarka nahay ee Itoobiya, Jabuuti iyo Soomaaliya.
Labadda maalmood ee Axada iyo Isniinta midba shan qof ayaannu eegnaa, labada maalmood ee kale waxa noogu jira laba qof oo dheeraad ah oo haddii aanay ballansanayn oo si kedis ah ay noogu yimaadaan iyagana aanu ku darno. markaa lix iyo lix ayay noqonaysaa in aannu eegno todobaadkiiba.
Maalinta Salaasadda, waxaa la sameeyaa kormeer lagu ogaanayo qofka in xannuunkiisu uu hoos u dhacay iyo inuu kor u kacay, iyo in dawadii uu qofkani qaadanayay uu u qaato sidii loogu tallo galay, in laga joojiyo bukaanka daawadda iyo in laga saaro cisbitaalka. Maalinta Arbacadda, waxaa soo noqda bukaannadii hore ee dibada nooga baxay iyaga oo soo noqda shan iyo tobankii maalmood hal mar amma bishiiba laba jeer si xaaladooda loo eego. Waxaananu is-la qaadanaa tallo ah bukaanka daawadii miyaynu ka joojinaa, mise waynu u sii wadnaa” ayuu yidhi isu-duwaha qaybta dhimirka ee cusbitaalka guud ee Hargaysa.”
Dr. Mustafe Xuseen, waxa kale oo uu sheegay in ay jiraan Bukaano iskood u yimaadda cusbitaalka, isla markaana soo doonto daawooyinka, iyadoo aanay cidna keenin. “Imika waxaa jira bukaanno badan oo iyagu iskood u yimaada oo dawooyinkooda soo doonta oo la qabsaday oo la walaaloobay xanuunkii dhimirka ee haleelay. Cisbitaalku waxa uu leeyahay in qof walba uu hello Gu’iisa, Furaashkiisii iyo SariirtiisiI, haddii ay noqoto Raga iyo haddii ay noqoto Dumarkaba.
Cisbitaalka waxaa jooga dhakhaatiir khibrad iyo aqoon dheerad ah u leh daaweynta dadka xanuunsanaya, waxaana la siiyaa dadka xanuunsanaya Caano iyo Timir. Caanahan iyo Timirtanina meel kale noogama yimaadaan ee waxa noo keenta bulshada qeybaheeda kala gedisan, gaar ahaana Dumarka. hase ahaatee raga iyaga wax caawimo ah kama helno. Haweenku waa kuwa keliya ee nala og kana warhaya dadkan xanuusanaya.”
“Dhanka kale waxa meesha ka furan dugsi dadka aanu wax ku baro marka ay caafimaadaan anaga oo barna xisaabta iyo qorista Af-Soomaaliga, Dawaarka iyo Laydhka, hagaajinta Moobilada oo maanta haddii telefoonka aad sidataa kaa xumaado iyagaa kuu samaynaya, oo kuu hagaajinaya,”ayuu yidhi Mr. Mustafe.
By: Khadar M.Xaashi
Dawannews Hargeysa office
