Hargaysa (Dawan): Xubnaha gudidda golaha Guurtida ee loo xilsaaray inay ka soo tallo-bixiyaan qorshaha la doonayo in muddada loogu kordhiyo wakhtiga ay qabsoomayaan doorashooyinka madaxtooyadda iyo wakiiladda oo maalmahan kulamo gooni-gooni ah la yeelanayay dhinacyadda ay khusayso arrintaasi, ayaa shalay waxay kulamo la yeesheen masuuliyiinta xisbiga Kulmiye iyo gudidda doorashooyinka.
Gudidan oo ka kooban 29-xubnood oo laga soo xulay golaha guurtidda ayaa hawshoodu tahay in ay keenaan muddo kordhin loo sameeyo xukumadda iyo golaha wakiiladda oo la qorsheeyay in ay doorashadoodu dhacdo badhtamaha sanadkani, haseyeeshee la sheegay in ay dib uga dhaceen wakhtigaasi.
Waxaanay wararku sheegayaan in kulankaasi ay gudidda guurtidu la yeesheen komishanka doorashooyinka iyo madaxda sare ee xisbiga Kulmiye ay iskula soo qaadeen arrimo la xidhiidha sidii dalka looga hirgelin lahaa doorashooyinka madaxtooyadda iyo wakiialdda iyo diiwaangelinta codbixiyeyaasha.
Guddoomiyaha gudidda doorashooyinka C/qaadir Iimaan Warsame, oo warbaahinta la hadlay ka dib markii kulankaasi dhamaaday waxa uu sheegay in kulankaasi uu ahaa mid ay dhinacyadu kaga arrinsanayeen sidii la iskula qaadan lahaa in wakhti la isla ogol yahay doorashooyinku ay dalka ka qabsoomaan.
Waxaanu intaa raaciyay C/qaadir Iimaan in kulankaasi uu ku soo dhamaaday is-afgarad, hase yeeshee mar ay saxaafadu waydiisay guddoomiyaha inuu si cad u sharaxo rasmi ahaan waxa uu kulankaasi ku saabsanaa iyo waxyaabihii ay isla afgarteen, ayaa ka gaabsaday in uu wax faahfaahin ah ka bixiyo.
Dhinac kale hogaanka sare ee xisbiga Kulmiye oo ay gudidaasi kulan la yeesheen ayaa sheegay in ay ka wada hadleen arrimo ay ka mid ahaayeen sida ugu haboon ee doorashooyinka loo hirgelin karo iyo sidoo kale in mudadda doorashadda ka horaysa la dhamaystiro shuruucda loo baahan yahay, sida in dalka laga sameeyo diiwaangelinta codbixiyeyaasha.
Waxaanay mas’uuliyiinta xisbiga Kulmiye sheegeen inay u gudbiyeen gudidaasi tallo-bixinta sida ay iyaga ula muuqato in lagu samayn karo muddo kordhinta xukuumadda iyo golaha wakiiladda si ay doorashooyinku u qabsoomaan.
Guddoomiye ku xigeenka koowaad ee xisbul-xaakimka Kulmiye Maxamed Kaahin Axmed, ayaa warbaahinta faahfaahin ka siiyay qodobadii ay ergadda guurtidda ka wada hadleen, waxaanu yidhi “Dastuuriyan anagu xaq uma lihin muddo kordhinta, laakiin waxaanu ku talinay, iyagoo ka duulaya ergadu arrimaha doorashooyinka soo socda iyo xil-gudashadoodda inay wakhti macquul ah oo ay doorashooyinku ku qabsoomi karaan ay u qabtaan.
Waxyaabaha aanu sida gaarka ah u tilmaamay waxaa ka mid ah doorashadan imiku waa doorasho inagu cusub, waxaana la isa-saaray doorashadda madaxtooyadda iyo ta golaha wakiiladda.
Sidaas darteed, waxyaabaha dhiman waxaa ka mid ah:
. Doorashadda golaha wakiiladda sharcigii lagu maamuli lahaa ilaa imika lama hayo, oo ma samaysna.
. Waxa kale oo inoo yaala golaha wakiiladda oo laba xili fadhiyay, xeerkii lagu doortay berigii hore iyo saamigii lagu qaybiyay ee goboladda wuxuu ahaa mid hal mar ah. kii hore imika ma shaqeeyo, markaa waa in xeer cusub loo sameeyaa”.
Gudidan loo xilsaaray inay ka soo tallo-bixiyaan muddo kordhin loo sameeyo xukuumadda oo sidoo kale Isniintii doraad kulamo la yeeshay mas’uuliyiin ka tirsan axsaabta mucaaradka ah ee UCID iyo Waddani, waxaana la sheegay inay kala hadleen arrimo la xidhiidha wakhtiga ugu haboon ee doorashooyinka dalka la qaban karo.
Sida uu sheegay af-hayeenka xisbiga Waddani Boobe Yuusuf Ducaale, oo saxaafadda uga warbixiyay kulankii ay ergadda guurtidu la yeesheen iyo qodobadii ay isla soo qaadeen, waxaanu yidhi “Kulankaasi markii uu furmay ka dib, guddoomiyaha golaha guurtidu hal su’aal ayuu na waydiiyay oo ahayd arrinka maanta taagan, kaasi oo aanu u qaadanay maalinta Komishanku cayimay iyo hadaladda ka taagan.
Markaa anagu dar-daarankayagii ayaanu bixinay iyo waxa ay nala tahay, oo ah in aanu khilaaf taagnayn, ee maalintaasi ay Komishanka doorashooyinku cayimeen, oo ay xaq iyo xeerba u leeyihiin la sharciyeeyo, oo maalin iyo daqiiqad toona aan lagu darin”.
By: Khadar Cabdi Muse
Dawannews Hargeysa office
