Hargaysa (Dawan): -Xildhibaan C/Qaadir Jaamac Xaamud, oo ka tirsan Golaha Wakiiladda ayaa sheegay in aanay beesha caalamka khusaynin wakhtiga ay qabsoomayaan doorashooyinka Somaliland, isla markaana ay Somaliland u madax-banaan tahay hawlaheedda.
Xildhibaan Xaamud oo shalay la hadlay qaar ka mida warbaahinta ayaa waxa kale oo uu sheegay inuu soo dhawaynayo muddo kordhintii ay Golaha Guurtidu u sameeyeen xukuumadda iyo Golaha Wakiiladda.
“Beesha caalamku innooma hayso wixii arrimaheenna ah innagaa og sida doorashaddu ay u dhacayso iyo baahiyaha dalka yaalla, oo innaga ayaa ka war-hayna, weliba madaxweyne loo igmaday hawlahaasi ayaa jira. Markaa waxa weeye in beesha caalamku nagu taageerto wixii aynu ula tagno ee ra’yi ah. laakiin haddii mashaariic lagagu soo qaato oo lagu yidhaahdo beesha hadana waxba kuu qabsoomin, imisa jeer ayaa dalka doorasho laga qabtay haddana waxa ay la lahaayeen waan idin ictiraafaynaa hadana waxba ma qabsoomin,”ayuu yidhi Xildhibaan Cabdiqaadir Jaamac Xaamud.
Waxa kale oo uu ka hadlay muddo kordhinta Golaha Guurtidu u sameeyay xukuumadda iyo Golaha Wakiiladda. waxaannu yidhi “Waxaan ku hambalyaynayaa muddo kordhinta Golaha Guurtidu u sameeyeen xukuumadda iyo Golaha Wakiiladda sababaha aan u hambalyaynayaana waxa jira gobolo aan si fiican doorasho uga dhicin oo ah gobolada bariga dalka, waxaanan filayaa labadaa sanno ee la kordhiyay in la sixi karo sidii doorashaddu u qabsoomi lahayd.
Xukuumadduna dedaal badan ayay samaysay waxaanan qabaa in xukuumaddu muhiimadda siiso sidii loo hanan lahaa goboladda bari oo loo gaadhsiin lahaa diiwaan-gelinta iyo haddii ay noqoto xaga Caafimaadka iyo waxbarashada laga hawl-galo.”
Xildhibaanku waxa uu sheegay inay haboon tahay in doorashooyinka dalka ka wada dhacaan. “Waxa haboon in mar doorashadda laga wada qabto dalka, waxaana Komishanka doorashooyinku balanqaadeen inay tagayaan goboladii hore doorashooyinku ka dhicin ee ay ka mid yihiin Laasqoray iyo Buuhoodle, taana waan ku hambalyaynayaa waanan kala shaqaynaynaa.
Waxa uu tilmaamay xildhibaanku in Guurtiddu ay raaceen dastuurka dalka u yaala, oo jidaynaya muddo kordhinta ay sameeyeen. “Waa dastuuri in muddo korhdin Golaha Guurtiddu sameeyo, dastuurka ayaana dalka saldhig u ah.Markaa qofkii ka horyimaadaa isaga ayay u taalaa qof walina inuu sharciga ilaaliyo wuu ku khasban yahay” ayuu yidhi xildhibaan Xaamud.
By: Khadar M. Dhako
Dawannews Hargeysa office
