Ugu yaraan 45 askari oo ka tirsan booliska dalka Ciraaq ayaa lagu dilay weerar ismiidaamin ah oo ay gobolka Anbaar ka fulisay kooxda Dowladda Islaamiga ah.
Gawaadhi laga soo buuxiyay walxaha qarxa ayaa waxaa lagu dhuftay saldhig uu boolisku ku leeyahay magaalada Ramaadi.
Ila wareedyo boolis ah ayaa sheegaya in saldhiga weerarka lala beegsaday ay dhawaantan soo gaadhay shixnad ka timid Iiraan oo ah gantaalada lidka diyaaradaha ah.
Waxaa loo malaynayaa in qofka ismiidaamiyay uu isku qarxiyay xidhmo hub ah, taasi oo keentay in ay dhacaan qaraxyo badan.
Taasina qeyb ahaan waa sababta ay askar badani u dhinteen, oo sida la sheegay ay ka mid yihiin 15 la taliyayaal oo u dhashay waddanka Iiraan.
Milateriga Iiraan ayaa waxa uu si cad u taageeray dagaalka ay ciidammada dowladda Ciraaq kula jiraan kooxda Daacish, iyadoo hogaanka Ciraaqna uu taageeradaasi ku tilmaamay mid “asaasi ah”.
