Ceerigaabo (Dawan): Madaxweynaha Jamhuuriyadda Somaliland Axmed Maxamed Maxamuud (Siilaanyo), ayaa shalay ka qaybgalay munaasibad ay ku qalin jabinayeen arday dhamaysatay Kuliyadda Beeraha ee Jaamacadda Sanaag ee magaaladda Ceerigaabo.
Madaxweyne Siilaanyo iyo weftiga uu hogaaminayo oo maalmahanba socdaal ku marayay gobolada Bari ee dalka ayaa sidoo kale madaxweynuhu waxa uu booqday cisbitaalka guud ee magaaladda Ceerigaabo.
Waxaana madaxweynaha Shahaado sharaf guddoonsiiyay ardayda ka qalain jabiyay jaamacadda Sanaag ee Ceerigaabo, shahaado sharaftaasi oo ay ku tilmaameen in ay madaxweynaha ku boogaadiyay waxqabadka uu dalka ka sameeyay gaar ahaana gobolada Sanaag.
Madaxweyne Siilaanyo, oo hadal ka jeediyay munaasibadaasi qalin jebinta ayaa ku amaanay ardaydaasi dedaalkii dheeraa ee ay u soo mareen waxbrashadoodda, isagoo tilmaamay in ay maanta gaadheen ka midho-dhalinta hamigoodii.
Axmed Siilaanyo, waxa uu sheegay in xukuumadiisa ay ka go’an tahay dhiiri gelinta dhalinyaradda iyo shaqooyin loo abuuro intii awoodooda ah ardayda ka soo baxda jaamacadaha dalka. Waxaanu madaxweynuhu kula dar-daarmay ardaydaasi in ay iyaguna noqdaan kuwo mar kasta kuwo ka qayb qaata dhismaha iyo horumarka dalka.
Wasiirul dawlaha wasaaradda Maaliyada Cismaan C/laahi Saxardiid (Cadaani), oo ka mid ah xubnaha la socda weftiga madaxweynaha oo isna halkaasi ka hadlay ayaa sheegay in dhallinyaradani shahaadada guddoonsiisay madaxweynaha ay ka dhaadhacday waxqabadka xukuumadda iyo qiimaynta ay ku sameeyeen.
Waxaanu yidhi “Waa dhallinyaro runtii fahamsan oo ay ka dhaadhacday waxqabadka ay dalka ka hirgalisay xukuumadda madaxweyne Siilaanyo haddii ay wado tahay, haddii ay caafimaad tahay iyo haddii ay tahay Dugsiyo tahayba, waa dhallinyar runtii taageero kuu haysa madaxweyne”.
Guddoomiyaha gobolka Sanaag Axmed Cabdi Falaay, oo isna munaasibadaasi ka hadlay, waxa uu yidhi “Mudane madaxweyne waa dhalinyartii aqoonyahanka ahaa ee gobolka wax ka bartay waxaana ay doonayaan waxqabadka aad dalka ka wado in ay shahaado sharaf kugu siiyaan”.
Sidoo kale arday ka mid ahaa dhallinyaradii Shahaadadda guddoonsiisay madaxweyne Siilaanyo oo halkaasi ka hadlay ayaa ku amaanay xukuumadda taladda haysa waxyaabaha ay ka fulisay gobolka Sanaag. waxaanu yidhi “Madaxweyne waxa aanu nahay dhallinyar aqoonyahana oo ka soo baxday Jaamacadaha dalka iyo kuwa dibada ah oo gobolkan dib ugu soo noqday waxa aanu go’aansanay in shahaado sharaf guddoonsiino madaxweynaha Somaliland Axmed Maxamed Maxamuud Siilaanyo.
Taas oo ay sababteedu tahay sida dalka aad wax uga qabatay gaar ahaan gobolka Sanaag oo 156 sano oo taariikhda la hayo lahan wado wax aan kuu sheegaynaa madaxweyne ku dhiirashada aad samaysay in wadada Ceerigaabo la sameeyo waa mid aan abaal kuugu hayno oo taariikhdu ku xusu doonto oo lama ilaawaana” ayuu yidhi ardaygaasi oo u hadlayay ardaydii amdaxweynaha shahaado sharafta gudoonsiiyay.
By: Khadar M. Dhako
Dawannews Hargeysa office
