Hargeysa (Dawan): Shir-dhaqameed ku saabsanaa ilaalinta xeerarka dhaqanka oo muddo ka socday deegaanka Labi sagaale oo ka tirsan deegaanka gobolka Maroodi-jeex, ayaa la soo gabagabeeyay. Shir-dhaqameedkaasi ayaa intii uu socday waxaa si weyn loogaga hadlay ilaalinta iyo dhawrista dhaqanka oo ah udub-dhexaadka iyo jiritaanka ummadeed.
Waxaana shirkaasi ka soo qayb galay madaxdhaqameed, waxgarad , odayaal iyo masuuliyiin heer qaran ah oo ay ka mid yihiin guddoomiyaha golaha dhexe ee xisbiga KULMIYE Jaamac Maxamuud Cigge (Jaamac-Shabeel), agaasimaha xanaanada Xoolaha Jaamac Maxamed Odowaa iyo Wakiilka Somaliland u fadhiya dalka Sucuudiga Axmed Aadan Dagaal.
Sidoo kale shir-dhaqameedkaasi ka soo qaby galay Salaadiin, cuqaal, odayaal, aqoonyahan, culimo-awdiin iyo dhalinyaro iyo marti sharaf kale.
waxaanay halkaasi ka soo jeediyeen khudbado kala duwan oo ay kaga hadlayaan ilaalinta dhaqanka, deegaanka, horumarinta arrimaha bulshada, waxbarashada iyo arrimo kale oo muhiim u ah nolosha aadamaha.
Suldaan Axmed Cismaan Cadde Gudde oo ka mid ahaa salaadiinta gebagebadda shirkaasi ka hadlay ayaa ka soo qayb galayaasha ku hambalyeeyay kulankaasi. Waxaanu sheegay in uu ku faraxsan yahay ahmiyadda ay leedahay in bulshadda lagu wacyi geliyo ilaalinta dhaqanka iyo deegaanka, horumarinta adeegyada bulshada iyo adkaynta nabadgelyada.
Suldaanka oo arrimahaasi ka hadlayayna waxa uu yidhi “Danwadaago maanta way guulaysatay ee ILLAAHAY ha u aqbalo, hawsheeni si wacan oo tawfiiq leh ayay u soo gabagabawday, duco iyo karaamo ayayna inoogu soo gabagabawday. Siyaasada haddii laga hadlo dhibteeda iyo kadeedkeeda ayay leedahay, waxaan isku galaynin in dhaqanka dhidibada loo aaso iyo midantii iyo in siyaasad laga wada hadlo ayaan isku galaynin, sidaa darted wallaalayaan waar meel ayaynu isugu tagaynaa oo siyaasada dib ayaa loo naaqishi doonaaye danta reerka aynu meel isugu gayno.”
Gabagabadii shir-dhaqameedkaasi ayaa laga soo saaray go’aamo door ah oo ay ka mid yihiin Ilaalinta qarannimada Jamhuuriyada Somaliland in ay tahay lagama maarmaan, in ilaalinta degaanku ay tahay waajib saraan muwaadin kasta oo reer Somaliland ah.
Waxa kale oo ka mid ahaa go’aamada shirkaasi laga soo saaray in kor loo qaado waxbarashada ubadka yar yare e soo kacaya si loo helo jiil aqoon leh oo doorkooda ka qaadan kara horumarka dalka iyo qaranka. Sidoo kale, go’aamada shirkan laga soo saaray waxaa ka mid ah in ay beeshu si buuxda u taageersan tahay cid kasta oo ku hawlan ama kku dedaalaysa horumarka dalka Jamhuuriyada Somaliland iyo in sannad kasta la qabto shir noocan oo kale ah.
Dawannews Hargeysa office
