Berbera(Dawan): Wasiirka Wasaaradda Khayraadka Biyaha ee Somaliland Baashe Cali Jaamac, oo socdaal shaqo ku jooga gobolka Saaxil ayaa shalay kormeer indho-indhayn ah ku soo maray halka ay marayaan mashaariicda biyo balaadhinta magaaladda Berbera oo ka kala socda Dubaar iyo Faradeero.
Mashaariicda biyo balaadhinta Berbera ee laga waddo degaamadda Dubaar iyo Faradeero, oo ay hirgelinaysa xukuumadu, isla markaana laga maalgelinayo sanduuqa horumarinta Somaliland (SDF). Kuwaasi oo ah todoba Ceel-biyood.
Kormeerka uu shalay wasiirku ku soo maray halka ay marayaan mashaariicda biyo balaadhinta Berbera waxaa ku wehelinayay madaxda Gobolka Saaxil iyo kuwa degmada Berbera iyo maamulka Wakaaladda Biyaha Berbera.
Baashe Cali Jaamac, oo ka hadlay mashaariicdaasi ayaa balan qaaday in ay si dhakhso ah u dhamays-tirayaan todoba ceel biyood ee hadda gacanta lagu hayo, isla markaana kuwo kale oo cusub lagu soo kordhin doono. Waxaanu sheegay in Berbera ay tahay magaallo muhiim ah, isla markaana dhul xeeb ah ku taalla sidaas darteedna ay lagama maarmaan tahay in ay hesho biyo badan.
Wasiirka oo arrimahaasi ka hadlayayna waxa uu yidhi “Halkan (Dubaar) iyo Faradeero-ba waxaa laga samaynayaa sahamin biyo balaadhineed si biyo badan oo intan ka badan loogu helo magaaladda. sanadkan sanadka ka dambeeya xiliga Xagaagga waxaa noo qorshaysan in ay magaaladu hesho biyo badan oo dad iyo duunyoba ku filan”.
Waxaanu intaasi ku daray “Berbera waa magaalo muhiim u ah nolosheena waana magaalo xeebeed kulayl ah markaa in ay biyo intan ay imika haysato ka badan hesho, ayaan ku dedaalaynaa imikana waxaan rejaynayaa in ay todobadan ceel dhakhso u dhamaadaan, oo ay wax soo kordhiyaan. Waxaa kale oo la samayn doonaa sahamin iyo baadhis. marka baadhitaanka la sameeyana waxaa laga soo saari doonaa ceelal biyood oo intan ka badan”ayuu yidhi wasiir Baashe.
Dhinaca kale wasiirka Khayraadka Biyaha, oo weli Berbera ku sugan waxa uu kulamo kala duwan la yeeshay madaxda gobolka Saaxil iyo kuwa degmada Berbera iyo sidoo kale maamulka Wakaaladda Biyaha magaaladda Berbera. Kulamadaasi oo la xidhiidhay sidii ay dhinacyadaasi uga qayb qaadan lahaayeen mashaariicda biyo balaadhinta Berbera.
Faysal Xiis Weerar(Afgaab)
Dawannews Hargeysa office
