“Xisbiyadda Mucaaridku Waa In Ay Ku Qancaan Xaqiiqada Hortooda Taalla, Waxna Ka Bartaan KULMIYE”

“Boobe Horta Ummadda Ha Sheego Lacagtii Wasaaradda Warfaafinta Laga Cunay, Dadkana Af La Garanayo Ha Kula Hadlo”
Khadar M. Dhako
Hargeysa(Dawan):-Siyaasiga Maxamed Saleebaan Maxamed (Maxamed Saleebaan Weyne)  oo ka tirsan Xisbul Xaakimka Somaliland ee KULMIYE,ayaa  Xisbiyadda Mucaaridka ku dhaliilay siyaasad xumo iyo qorshe la’aan isla markaana ku tilmaamay tallaabooyinka ay qaadaan iyo hadaladooda siyaasadeed qaar aan jiho lahayn oo  xumaan aan jirin uun ka hadla iyo xag xagasho.
Waxaa kale oo uu  farriin tallo iyo waanu isugu jirta uu u diray Xoghayaha Warfaafinta Xisbiga Mucaaridka ah ee WADDANI Boobe Yuusuf Ducaalle oo uu ka daba socday eedaymo uu Xukuumadda Madaxweyne Siilaanyo u jeediyay.
“Boobe haddii uu doonayo inuu xabaalo faqo oo uu yidhaahdo  lacag baa la dhacay, lacagtii Wasaaradda Warfaafinta ee loo xidhay inankii ahaa Agaasimaha Maamulka Lacagta ee Wasaarada Warfaafinta ee inta uu jeelka tegay kala soo baxay horta tii dadka ha u  sheego. inta aanu mid kale gelin Wasaaraddii uu Wasiirka ka ahaa Boobe wixii ka dhacay ummadda ha u sheego iyo lacagihii la cunay, waxaanan  leeyahay indho sarcaad ha noo dhigin. Haddii aad dadka la hadlaysana Af Soomaali dadku  garanayaan ayaa lagula hadlaa oo ciddi garan mayso yaabkii ayaa yaabay  Af Soomaali dadku kuu garto in aad tahay nin siyaasiya ku hadal.”
Maxamed Saleebaan Weyne waxa uu sheegay in madaxweyne Siilaanyo ka tagayo taariikh weyn,  waxaana uu yidhi “Waxaa kale oo uu ka hadlay taariikhda iyo dhaxalka uu Madaxweynaha Somaliland Bulshadda iyo qarankaba uga tegayo oo uu tilmaamay in ay tahay taariikh dahabi ah oo ku suntan hoggaaminta Madaxeweyne Siilaanyo. Madaxweyne Silaanyo waxa uu ka tegayaa taariikh ummaddana dhaxal  waanagsan ayuu uga tegayaa. ninkii dhexalkaa Madaxweynaha ku bogaadinaya ee ku ammaanaya waa meesheeda, ninkii sii xag-xaganayana isagay u taallaa. waxaanu ahaa mujaahidkii dalkan xoreeyay waxaanu ka qeyb-galay dib u dhiskii dalka, nabadayntii,  dawladnidii iyo dimuqaadiyadii dalkan ayuu ka qeyb-galay 80 cod iyadoo lagaga helay ayuu ogolaaday.”
“Xisbiyadda mucaaradku in ay is yidhaahdaan  cirka guudkiisa ka kalluumaysta maaha xaqiiqada horkooda taalla in ay ku cibro qaataan weeye ha kuna daydeen dimuquraadiyadii uu maray xisbiga KULMIYE meelna ku gaadhi maayaan xisbiyadda mucaaradku  is xag-xagasho iyo is jiid-jiid,”Ayuu yidhi Maxamed Saleebaan Weyne.