Hargeysa (Dawan)- Ciidanka ilaalinta Cashuuraha Somaliland ayaa gubay shixnad baco ah oo sifo kootarabaan ah dalka lagu soo gelinayay oo ay qabteen, kuwaasi oo isticmaalkooda iyo ka ganacsigoodaba laga mamnuucay dalka, ka dib markii uu madaxweynaha Somaliland amar ka soo saaray.
Taliyaha Qaybta ciidanka ilaalanta cashuuraha Somaliland Gaashaanle Saleebaan Ducaalle Ubaxle ayaa warbaahinta qaranka la hadlay kadib markii ay gubayeen bacahaasi waxaanu yidhi “Waxaanu maanta (shalay) gubnay qeybo ka mid ah bacihii dalkeenna laga mamnuucay oo ay ciidanka ilaalada cashuuraha Somaliland qabteen iyadoo si fo tuugo ah dalkeenna lagu soo gelinayo.”
“Annaga oo fulinayna amarkii Madaxwayna Somaliland ee mamnuucayay in bacaha dalka la keeno nooc kasta oo ay yihiin isla markaana tix-raacayna warqadii amarka ahayd ee Taliyaha Ciidanka Booliska Somaliland ee ahayd in ciidanka ilaalada cashuuruhu qabtaan bacahaasi meel kasta oo dalka laga soo gelinayo. waxaanu maanta (shalay ) halkan kastamka dhexe ee magaalada Hargeysa dhexdiisa ku gubaynaa saddex jawaan oo waaweyn oo lagu soo qariyay bacahaasi la mamnuucay kuwooda wax lagu rito oo sifo tuugo ah la rabay in magaalada Hargeysa lagu geliyo la rabay oo ciidanka ilaalada cashuuruhu qabteen,” ayuu yidhi Taliyaha Qeybta ciidanka ilaalanta cashuuruhu.
.
Taliyuhu waxa kale oo uu intaa ku daray “Waxaanu muwaadiniinta reer Somaliland ka codsanaynaa in ay fuliyaan amarkaasi lagu mamnuucay bacaha oo aynu dhammaanteen og nahay dhibaatada ay deegaanka iyo xooleheenna ku hayso. waxaa aad muwaadin og tahay in la joojiyay warshadihii bacaha soo saari jiray iyo dhammaan bac oo dhan haddii ay tahay noocyada wax lagu rito iyo ta baabuurta lagu xidho ee loo yaqaano beersoosha.”
“Wuwaadin adiga oo fulinaya amarkaasi ka soo baxay dawladaada ee mamnuucayay bacaha adigoo muwaadin dalkaaga iyo deegaankaaga u tudhaaya waxaanu kaa codsanaynaa in aanad dalka keenin wax bac ah . Waxaa aanu ku war-gelinaynaa dhammaan ciidamada Booliiska iyo ciidanka ilaalada cashuuraha ee jooga xadadka dalka laga soo galo in ay qabtaan nooc kasta oo bacaha ka mid ah oo dalkeenna soo gelaysa oo ay fuliyaan amarkaasi,” ayuu yidhi Taliyaha Gaashaanle Saleebaan Ducaale Ubaxle. Waxa kale oo uu muwaadiniita cashuur bixiyeyaasha ah ku war-galiyay in ay bixiyaan cashuuraha bariga nooc kasta oo ay yihiin gaadiid iyo guryaba.
Dawannews Hargeysa office
