Hargeysa(Dawan)- Guddoomiyaha dallada Khayriga ah ee Jimciyada Raxma Alkheyriya Mr. Cabdalle Maxamad Ibraahim iyo wefti uu hogaaminayo ayaa kormeer shaqo ku soo maray degmooyinka Allay Baday, Farawayne iyo Sayla, kormeerkaasi oo lagu dersayay xaaladda abaareed iyo saamaynta ay ku yeelatay dadka iyo duunyada ku dhaqan deegaankaasi.
Deegaanada hoos yimaada degmooyinka degmooyinka Farwayne, Alleybaday iyo Sayla ayaa muddooyinkii u dambeeyay laga soo sheegayay xaalad nololeed oo qalafsan, taas oo ay sababtay abaar ba’an oo ku dhufatay dad iyo duunyaba, iyada oo ay halkaasi ka hayaameen inta badan bulshadii ku dhaqnayd deegaanadaasi.
“Waxaan ugu baaqayaa ummada islaamka meel kasta oo ay joogaan, Somaliland iyo waliba dadka kale muslimiinta ah waxaan leeyahay xaaladda aanu soo aragnay waa xaalad naxdin leh, waa mid oohinle oo aad u adag, waxaan markaa leeyahay ummada reer Somaliland, Hay’adaha dawliga iyo kuwa aan dawliga aheyn iyo ummada kale muslimka ah degmooyinkaas aanu soo maray dhibaato aad u laxaad badan ayaa ka taagan markaas haloo gurmado,”ayuu yidhi Cabdalle Maxamed Ibraahim.
Cabdiraxmaan Maxamad Maxamuud oo ka mida dadweynaha deegaanka Sayla galbeed ayaa sheegay in meesha ay ka dhacday abaar dad iyo duunyaba saamaysay waxaanu yidhi “Dadkii wax bari bay u guureen, waxna galbeed bay u guureen,wax biyo la’aantii bay u guureen meel biyo leh, marka guryaha deegaankan oo dhan waa laga maqan yahay,aniga oo u dambeeyay dadka markii aan yaabay waxaan caruurtii iyo reerkiiba kala geeyay Sheekh Mooldhe iyo Hargeysa si aan bal badbaado uun ugu helo.”
Hooyo da’ ah oo ka mid ah waayeelka deegaanka lagaga guuray ayaa shaaca ka qaaday inaan wadanka biyo iyo baad midna lagu ogeyn waxaanay tidhi “Laguma oga wadanka biyo iyo baad midna ,abaar weeyi mida kale abaarta AllAA hayee laakiin raashin la’aan iyo biyo la’aan ayaa maanta noogu daran, markaa meeshu meel tirsan maaha,aniguna waan kici kari waayay oo adin ayaan ka dhutinayaa,oo halkaas aad iigu timid ayaan fadhiyaa, marka meeshu rejo rajadeed malaha oo wixii naloo qaban karo ha naloo qabto.”
Gahayr Yuusuf Wacays oo ka mida dadka ku nool degmada Faraweyne, ayaa tilmaamay inaanay abaartani aheyn mid hore nooceedu u soo martay dalka waxaanu yidhi “Degmadan Farweyne waa degmo xukunta ilaa 38 tuulo, abaarta iyo biyo la’aanta deegaankan ka jirtaa maaha mid hore noo soo martay, waxaan ku suurayn karaana ma jirto. dhacday abaar duunyo, abaar dad, abaar biyood iyo tu cunto, xoolaad iyo tu dad mid waliba gabaabsi ayuu nagu yahay,”
Faarax Aw Xasan oo ah gudoomiyaha tuulada cadaroosh ayaa isaguna faahfaahin ka bixiyay xaalada abaareed ee deegaankaas, waxaanu yidhi “Wax midhoo sannadka wadanka ka baxay ma jiro,wax xoolihii ay ku soo noqdaan oo ay waydii kaga baxaana ma jiro, si weyn baanay abaartu u halis badan tahay oo ay u saamaysay dadka,waana mid aad u daran oo imika abaar dad iyo mid duunyo ayaaba dhacday oo abaarta dadka ayaa u daran oo xoolihii ay dadku iibsan lahaayeenna waa weyd, iibka xooluhuna aad iyo aad ayuu u liitaa, markaa marka laga tago ta xoolaha imika ta dadka ayaaba loo baqayaa oo halisku jirta,markaas Dawladda waxaanu leenahay waar na soo gaadha oo Ilaahay baa wax hayee wixii aad wax nooga qaban kartaan wax nooga qabta dad iyo xoolaba waxaanu la il daranahay waa abaare.”
Dawannews Hargeysa office
