Hargeysa(Dawan)-Masuuliyiinta Sanduuqa horumarinta Somaliland ee SDF, tabobar uu u qabtay dhawaan 90 Suxufi oo ka hawlgala warbaahinta dalka, iyadoo loo kala qeybiyay ka qaybgaleyaashii tabobarkaas saddex kooxood oo mid waliba ka koobanayd 30 suxufi. waxaa lagu tartansiiyay koox kasta inay soo qorto warbixin la xidhiidha mid ka mid ah mashaariicda laga fuliyay Somaliland ee laga maalgeliyay sanduuqa SDF.
Xaflad loo sameeyay gunaanadka tabobarkaas oo Isniintii lagu qabtay Huteelka Ambassador ee Hargeysa, waxa abaal-gud iskugu jiray Laptop-yo, kamarado iyo rikoodho la gudoon siiyay xubnihii saddexda kooxoodba u galay kaalmaha koowaad, labaad iyo saddexaad.
Weriye Siciid Faarax Muuse (Cagjar) oo ka mid ah Suxufiyiinta wargeyska Dawan, ayaa kaalinta koowaad u galay kooxdiisii, waxaana la gudoon siiyay laptop iyo shahaado sharaf. Waxa abaalmarinta uu ku guulaystay soo dhaweeyay Masuuliyiinta Dawan Media Group. Waxaanay sheegeen inay tallaabadani tahay mid ay aad ugu farxeen oo ka turjumaysa horumarka ay shaqaalahoodu ka sameynayaan xirfada saxaafadda.
Weriye Siciid Cagjar, oo ka hadlay abaalmarinta la gudoon siiyay, ayaa u mahadceliyay macalimiintiisii, sida uu ku baahiyay bartiisa xidhiidhka dadweynaha ee Face-book, “Tabobar la xidhiidha gudbinta wararka togan iyo horumarka dalka oo ay ka qayb qaateen 90 Saxafi islamarkaana ay bixinayeen SOLJA Iyo Sanduuqa Horumarinta Somaliland ee SDF ayaa la soo gunaanaday.
Waxaan Alle ugu mahadnaqayaa in aan ka mid noqday saddexdii Saxafi ee ugu sareeyey qiimayn lagu sameeyey qaabka gudbinta talmoon, dhammaan waanu guulaysanay. wax badana waanu faa’iidnay. Mahada labaada waxaan u celinayaa Macalimintaydii , Tifaftiraha Wargeyskayga Dawan iyo walaashay Deeqa Axmed Cabdilaahi oo aanan la’aanteed guulaysteen,”ayuu qoraalkiisa ku yidhi Siciid Cagjar.
Dawannews Hargeysa office