Hargeysa(Dawan)- Xildhibaan Cali Maxamed Aadan (Cali-Barre) oo ka tirsan Mudaneyaasha Golaha Wakiilladda Jamhuuriyadda Somaliland, ayaa ku tilmaamay talaabo dastuurka waafaqsan digreetadii uu madaxweyne Axmed Siilaanyo kaga wareejiyay wasaarada caddaaladda maamulka shaqaalaha miisaaniyadda maxkamadaha hoose, kuna hoos geeyay maxkamadda sare.
Waxaanu sheegay in ay qayrul dastuuri ahayd in ay isku lamaanaadaan Wasaarada Caddaaladda iyo Garsoorku, isagoo ku eedeeyay Wasiirkii hore ee wasaaradaas Xuseen Axmed Caydiid in uu si qayrul sharci ah u maroorsaday waaxda garsoorka maadaama oo isku lamaaneeyay garsoorka.
Cali Maxamed Aadan oo shalay magaaladda Hargaysa ugu waramayay wargeyska Dawan, waxa kaloo uu ka hadlay saldhiga milatari ee dawladda imaaraadka carabtu ka doonayso Somaliland.
Xildhibaanka oo ka hadlayay digreetadii madaxweynuhu soo saaray wuxuu yidhi, “Arrin dastuuri ah ayay ahayd ilaa madaxweyne Maxamed Ibraahim Cigaal ALLE ha u naxariistee, waanu isku haysanay. Dastuurku wuxuu dhigayaa in waaxda garsoorku maxbannaan tahay, qarankuna wuxuu u qaybsan yahay saddex waaxood, oo kala ah waaxda fulinta, waaxda xeer dajinta iyo waaxda garsoorka.
Waaxi-na waax kale shaqadeeda ma qaban karto, mana hoos tagto. dhammaanba waaxyahaasina madaxweynaha ayay wada hoos tagaan oo dalka ugu sareeya. Markaa maxkamadaha hoose iyo shaqaalahooda waxaa ka masuul ah guddida Caddaalada oo ah qayb ka mid ah waaxda garsoorka sharcigu sidaas ayuu qorayaa.Awalna khalad dastuuriya oo jiray ayay ahayd. Dawladihii Cigaal, iyo Rayaale intii madaxweyne Siilaanyo xilka hayay intaasba khalad bay u hoos joogtay wasaarada caddaaladda.
Talaabo waafaqsan dastuurka iyo sharciga dalka u yaala ayuu qaaday madaxweyne Axmed Siilaayo, aad iyo aadna waan ugu hambalyaynayaa talaabadaa uu qaday. Waxaanan talo ku soo jeedin lahaa in madaxweynuhu waaxda garsoorka iyo culimadda u yeedho si dalka diinta islaamka loogu dhaqo ilaa diinta aynu isku xukuno caddaalad la heli mayno.”
“Wasaaradda Caddaaladda iyo Garsoorka cidda isku lamaanaysay waxa uu ahaa Xuseen Axmed Caydiid Wasiirkii hore ee wasaaradaas ee meesha iskagaga cararay iyadoo ciddina ka eryin ee durbaanka shaydaanku u tumay. Markaa isagaa magacaa ku lamaaneeyay wasaarada caddaalada garsoorka sharci darro ayayna ahayd. Sidaa madaxweynuhu u dhigay ayaana waafaqsan sharciga iyo dastuurka.
Dastuurka waxaa ku yaala wasaarada Caddaaladda Garsoorku waa wax ka madax bannaan waaxda fulinta, dastuurka ayaana tilmaamaya xidhiidhka ka dhaxeeya wasaarada caddaaladda iyo garsoorka xeer ayaana qeexaya qaabka ay u wada shaqaynayaan oo aanu ansixinay oo madaxweynuhu saxeexay oo dhaqan galay,” ayuu yidhi Xildhibaan Cali Barre.
Geesta kale xildhibaan Cali Barre, ayaa u soo jeediyay xildhibaanada mucaaradka ah in aanay ka hor dhicin haddii uu jiro heshiis xukuumaddu la soo gashay dalka imaaraadka carabta si saldhig milatari ay uga samaysato madaarka magaalada Berbera. Isagoo arrintaas ka hadlayayna wuxuu yidhi, “Wax heshiis ah oo noo yimid ma jiro, haddii aanu nahay golaha Wakiilladda. Khalad ayaanan u arkaa xildhibaanka ka hadla in xukuumaddu heshiis kula soo gashay dalka imaaraadka carabta si saldhig milatari ay uga samaysato madaarka Berbera, kana hor dhicin mayno heshiisku haddii uu jirana xukuumaddu way soo geli kartaa heshiis, waxa uu doono ha noqdee.
Hadduu madaxweynuhu dan u arko, marka heshiis uu soo galo golahayaga ayaa loo soo gudbinayaa, annaguna waanu eegaynaa in dalka uu dan u yahay heshiiskaasi marka na loo soo gudbiyo heshiiskaas ayaan ka fiirsan doonaa.”
Dawannews Hargeysa office