Hargeysa(Dawan)- Guddoomiye Ku-xigeenka Guddida joogtadda ee Golaha Wakiillada Somaliland, Md. Axmed Ducaalle Bulaalle, ayaa walaac xoogan ka muujiyay xannuuno ka dilaacay degaanno k mid ah gobolka Buuhoodle iyo xaaladda nololeed ee ay ku sugan yihiin dadkii abaartu haleeshay ee ku dhaqan goballada bari ee dalka Jamhuuriyada Somaliland.
Xildhibaan Ducaale, ayaa ku baaqay in loo gurmado dadka xannuunku haleelay,waxaana uu tilmaamay shuban biyoodku ka soo gudbay dhinaca dawlad deegaanka Soomaalida Itoobiya oo xuduud la leh Somaliland.
“Abaar xoogan ayaa wali ka jirta dalka gaar ahaan goballada bariga xoolihiina intoodii badneyd way dhammaadeen, imikana halista taagani waxa weeye cuduro ayaa dilaacay goballada bariga oo xannuunka shuban biyoodku ka mid yahay, waxaanu ka soo gudbay kililka shanaad ee Itoobiya,waxaana uu soo gaadhay xanuunkaasi deegaannada gobolka Buuhoodle.
Macaluul ayaa ka jirta jiidaha abaareysan, dadkii xoolaha dhaqanayayna marxaladii ugu adkayd ayay galeen oo waa Kaliil roobkiina waa inoo di’i doonaa sidii ilaahay laga arki jiray,”ayuu yidhi Xildhibaan Ducaalle.
Xildhibaanku wuxuu ugu baaqay dawladda iyo Goleyaasha in tallaabada ugu weyn ee qaranku awooda saarayaa ay noqoto samato-bixinta bulshada abaareysan, waxaanu yidhi, “Waxaan ugu baaqayaa dawladda, goleyaasha qaranka, xisbiyadda iyo bulshadaba, waxaan leeyahay waa inay noqoto waxa qudha ee aynu diirrada saaraynaa ay noqoto gurmadka dadka abaartu hayso iyo degaannadaas xanuunku ka dilaacay iyo sidii dhimashada dadka loo badbaadin lahaa, arrinta aan ku baaqayaa waa taas waana in la joojiyo xafladaha la qabanayo.”
Xildhibaan Bulaalle, waxa uu sheegay in loo baahan yahay in la xoojiyo awoodii baanka dhexe uu wax kaga qaban lahaa sicir bararka iyo sarif bararka dalka ka taagan; “Sida wax looga qabanayo kor u kaca doolarka iyo sicir bararka oo ay keentay lacagtan sida faraha badan loo isticmaalayo ee doolarka oo qiimo riday shilinka Somaliland.
Waxaa loo baahan yahay in la xoojiyo baanka dhexe Somaliland, dawlad kasta baankeeda ayaa la dagaalama daalaa dhaca lacagta, baankuna malaha awoodii uu wax ku kaantarooli lahaa cidda sicir bararka wax ka qaban kartaana waa baanka oo la xoojiyo awoodihiisa iyo shaqadiisaba, Golaha Wakiilladuna wuu taageeray in baanka la xoojiyo,”ayuu yidhi Xildhibaan Ducaalle.
Xildhibaanku waxa uu tilmaamay in ceeb ku tahay in qaar ka mida xildhibaannada Golaha Wakiillada ka soo xaadiri waayaan fadhiyadda golaha,waxaanu yidhi; “Golaha Wakiillada xeer hoosaad ayuu leeyahay laakiin mar baa wax ka bedal lagu sameeyay, markaa qodobbadii wax ka bedalka lagu sameeyay ayaa la leeyahay hala fuliyo oo ha lagu shaqeeyo.waa dhibaato taagan in xildhibaannadu ka soo xaadiri waayaan fadhiyadda golaha xildhibaankuna hawl ayuu yeelan karaa, laakiin maqnaashuhu waa in uu cudur daarkiisa ayuu yeelan karaa,waana ceeb xildhibaanku in uu ka maqnaado fadhiyadda golaha oo uu dibadaha iskaga baxo xildhibaanada qurbo jooga ah ayaana u badan in dibadaha iskaga maqnaadaan oo iska dhoofaan ceeb weeye golihii oo shaqaynaya haddii aanu ku maqnayn xannuun ama hawl kale.”
Dawannews Hargeysa office