Gabiley (Dawan): Muran mudooyinkan ka taagnaa ceelasha biyuhu uga yimaadaan magaaladda Gabiley ee degaanka loo yaqaano Botor oo dhinaca Galbeed kaga beegan Gabiley ayaa la sheegay in soo af-jaray.
Waxaana soo af-jaridda khilaafkaas iska kaashaday odayaasha degaanka iyo masuuliyiinta dawladda hoose ee Gabiley, iyadoo la shaaciyay in si rasmi ah ay maamulka ceelasha biyaha Botor ula wareegtay dawladda hoose ee Gabiley.
Khilaafka ka taagnaa ceelasha biyuhu uga yimaadaan Gabiley ee Botor ayaa ka dhashay kadib markii bulshadda degaanka Botor ay sameeyeen rebshaddo ay kaga soo hor jeedaan in xukuumadu kaga baxday heshiis ay hore u wada galeen.
Heshiiskaasi oo ahaa in marka biyaha la soo saaro in dadka beeralayda ah qayb laga siiyo biyahaasi si ay beeraha ugu waraabsadaan.
Talaabadaasi oo keentay in bulshadda degaanka Botor ay jareen dhuumaha biyaha ka soo qaadda ceelasha ee keena magaaladda Gabiley, iyadoo ay taasina ka dhalatay in magaaladda Gabiley laga dareemay biyo la’aan maalmahan.
Sidoo kale waxaa jirtay in dad gaadhaya 35 ruux oo isugu jiray odayaal iyo dhalinyarro ka mid ah kuwa degaanka Botor loo soo xidhay falkii kicinta ahaa iyo jaristii dhuumaha biyaha, kuwaasi oo muddo todobaad ah ku xidhan saldhigyadda magaaladda Hargaysa.
Hase yeeshee waxaa shalay si wada jir ah degaanka Botor ee ceelasha biyo-soorka Gabiley uga sheegay in khilaafkaasi la soo af-jaray maayarka Gabiley oo ay wehelinayeen xildhibaano ka mid ah golaha degaanka iyo madax dhaqameedka reer Gabiley ah.
Maayarka Gabiley Maxamed Aamiin Cumar Cabdi, oo hadal ka jeediyay goobtii ay ka shaacinayeen in khilaafkaasi la dhameeyay waxa uu yidhi “Maanta (shalay) waxaanu halkan ka shaacinaynaa in aanu soo geba-gabaynay anagoo gacmaha is-haysana, odayaasha degaanka iyo dawladii-ba khilaafkii farsamo ee mudaba ka jiray ceelasha biyaha Botoreed. Ugu horayn ILLAAHAY (SWT) ayaan uga maahd celinaynaa oo maalmahan khayrka leh ee Ramadaan ina waafajiyay in aan gacmahaeena ku xalinay iyadoon dhib badani dhicin, dhibaatadii jirtay.
Marka labaad waxaan aad iyo aad ugu mahad celinayaa odayaasha dhaqanka oo hawshan laf-dhabar u ahaa in ay wanaag ku dhamaato. Waxa kale oo aanu maamul ahaan u mahad celinaynaa ciidamadda amaanka oo hawshaasi xalinteedii dhaawacyo culusi ku soo gaadheen”.
Geesta kale Salaasadii doraad ayaa dadka degaanka Botor waxay sheegeen in ay taageeradii kala noqdeen xisbiga KULMIYE oo ay hore u taabacsanaayeen, isla markaana wixii hadda ka danbeeya ay taageereyaal u yihiin codkoodana siinayaan xisbiga mucaaridka ah ee Waddani.
Haseyeeshee maayarka Gabiley ayaa ku dhaliilay in ay siyaasad xumo u tahay xisbiga Waddani, oo uu ku eedeeyay inuu siyaasadeeyay khilaafkaasi u dhexeeyay xukuumadda iyo dadka degaanka Botor.
“Biyuhu waa noloshii, in ay hadal galaan iyo in la siyaasadeeyo ma qurux bad-na. waxaanu u mahad celinaynaa dadkii wanaagaa ka qayb galay, waxaanu aad uga xunahay dadka sida qaldan u fikiraya ee in ay buun-buuniyaan, oo ay siyaasadeeyaan, ee fursad siyaasadeed ka deyay waxan noloshii umadu ku xidhan tahay.
Waxaanu leenahay iyaga-na (Waddani) ILLAAHAY ha soo hadeeyo, waxba ku fogaan mayno, dad baa meelahaa maryo cas-cas loo sudhay, aad baanan uga xunnahay. Xisbiga Waddani waa xisbi qaran, danta qaran-kana waa la wada leeyahay, mucaarid iyo muxaafid-ba, in Gabiley biyo hesho, oo dadka degaanka Botor ay xaqoodda helaan, mucaarid iyo muxaafid-ba in gacmaha la isku qabsado weeyi, laakiin haddii marba meesha wax yari ka dhacaan aad maryo cas la soo orodaan, waa idiin siyaasad xumo. Masuuliyadayadu waxay tahay bulshadda Gabiley ay biyo helaan, dadka reer Botoreed ee beerahoodda biyaha laga helayna ay xaqoodda helaan” ayuu yidhi maayarka Gabiley.
Dhinaca kale inkastoo maayarka Gabiley iyo odayaashii degaanka ee shalay halkaasi ka hadlay ay sheegeen in khilaafkaasi la soo af-jaray, labadda qolo midkood-na ma cadaynin waxa lagu qanciyay cabashadii bulshadda degaanka Botor ee la xidhiidhay in ay helaan biyaha qaybtii ay beeraha ku waraabsan lahaayeen sidii ay dawladda Somaliland ku heshiiyeen wakhtigii la bilaabayay qodista ceelasha.
Sidoo kale odayaasha iyo maayarka Gabiley ayaan soo hadal qaadin wakhtiga la sii daynayo dadkii loo soo xidhay falkii lagu jaray dhuumaha biyaha keena Gabiley, kuwaasi oo weli ku xidhan saldhigyadda booliska Hargaysa.
Dawannews Hargeysa office