Hargaysa (Dawan)- Wasiirka Wasaaradda Hawlaha Guud, Gaadiidka iyo Guriyaynta Jamhuuriyadda Somaliland, Md. Cali Xasan Maxamed (Cali Mareexaan), ayaa sheegay in xisbiga WADDANI joojiyeen olalihii ay dhex wadeen kaadh qaadashada diiwaan-gelinta codbixiyeyaasha ee Gobalka Togdheer, markii ay arkeen taageerada muga leh ee xisbiga KULMIYE ka haysto bulshada gobalkaas.
Wasiir Cali Mareexaan wuxuu ku eedeeyay xisbiga WADDANI inay iyagu bilaabeen in olale la dhex geliyo qaybinta kaadhadhka codbixiyayaasha ee ka socota goballada Togdheer iyo Maroodijeex.waxaannu caddeeyay in xisbal-xaakimku kaga taageero badan yahay WADDANI gobolka Togdheer oo uu ka soo jeedo.
“Xeer ayaa la saxeexay qofkuna haddii uu masuul yahay waxa uu saxeexo waa inuu u hoggaansamo waxaannu aragnay calamo lala taagan yahay Sheekh iyo Qoyta markaanu magaalada Burco galnayna Huteelkii aanu ku jirnay ayaa waxa noogu soo galay dhallinyaro calamo sidatay iyadoo la isku ogaa in komishanka loo hoggaansamo haddii wax isbeddeleen oo kaambayn bilaamay waxa istaadhay Xisbiga WADDANI,”ayuu yidhi Wasiirka Hawlaha Guud oo ka hadlayey xaflad degmada Mandheera ee gobolka Saaxil ay taageereyaasha xisbal-xaakimku u sameeyeen weftigii uu hoggaaminayey Guddoomiyaha ahna Murrashaxa Madaxweynaha ee xisbiga KULMIYE, Md. Muuse Biixi Cabdi.
Wasiirku waxa uu xusay in WADDANI uu fajiciso kala kulmay soo dhaweyntii loo sameeyay weftigii Guddoomiye Muuse Biixi, waxaannu yidhi; “Dabadeedna markii xisbiga WADDANI daad qaaday ayay cabanayaan oo ay leeyihiin meel baa calan laga dejiyay iyo nin baa tuullo loo diiday, durba qaylo ayaa ka soo hadhay waxaan leeyahay ragga waawayn lama soo doonto ama lama yaabo. Daan-daansigiinna waa halkaa la maraysa hadday moodayso in ay sidan ku noqonaysana Hudheelada ayay iska geli la haayeen.”
“Siyaad Bare berigii Xamar laga saaray meel la yidhaahdo Buur-dhuub ayuu tagay markii uu dadkii uu waayay wuxuu u khudbadeeyey geel waxaannu yidhi “Miyaydaan ogayn in aan ahay madaxweynihii xaqa ahaa ee Soomaaliya, qoladii WADDANI ee aannu ka soo saarnay Togdheer annagoo magaalo u khudbadaynayna ayay geed ka khudbaynayeen oo ay lahaayeen ‘makhluuqa intaa leeg ee noo soo baxay ee WADDANI taageeersan.’ gobolka Togdheer waa lagu kala badiyay, taageeraduna way muuqataa. waannu ka soo ambo-bixinay goballada bariga qoladii WADDANI, marka koox weerarada lagu badiyo (Ciyaaraha) difaacooda ayaa khal-khala markaa difaacoodu wuu khalkhalsan yahaye weerarada u sii badiya ayaan leeyahay reer KULMIYE,”ayuu yidhi Wasiir Cali Mareexaan.
Dawannews Haregysa office