Hargaysa (Dawan)- Madaxweynaha Jamhuuriyadda Somaliland, Md. Axmed Maxamed Maxamuud (Siilaanyo), ayaa shalay xarunta madaxtooayda ku qaabilay Guddoomiyihii hore ee Golaha Wakiillada, Md. Cabdiraxmaan Maxamed Cabdilaahi (Cirro), ahna murrashaxa madaxweynaha ee xisbiga mucaaridka ah ee WADDANI oo shalay si rasmiya ugu iskaga casilay xilkii aqalka Wakiillada.
Booqashadda uu murrashaxa xisbiga Waddani ugu tegay madaxweyne Axmed Siilaanyo, waxa ku wehelinayay Guddoomiye ku-xgeennada koowaad iyo labaad ee golaha Wakiillada, Baashe Maxamed Faarax iyo Dr. Cali Yuusuf Axmed.
Sidoo kale waxaa kulankaasi madaxweynaha ku wehelinaya wasiirka madaxtooyadda Maxamuud Xaashi Cabdi iyo afhayeenka madaxtooyadda Xuseen Aadan Cigge (Dayr), xoghayaha gaarka ah ee madaxweynaha iyo xubno kale.
kulankaasi kadib ayaa waxa warbaahinta faahfaahin ka siiyay afhayeenka madaxtooyada Eng. Xuseen Aadan Cige (Dayr), iyo murrashaxa xisbiga Waddani oo saxaafadda si wadajir ah ugula hadlay xarunta madaxtooyada.
Afhayeenka madaxtooyada ayaa sheegay in guddoomiyaha Waddani uu madaxweynaha uga mahadceliyay muddadii ay soo wada shaqeeyeen, halka madaxweynuhuna ku booriyay in danta guud ee qaranku ay mar walba mudnaanta koowaad yeelato. “Guddoomiyaha Waddani waxa uu madaxweynaha uga mahadnaqay muddadii dheerayd ee ay soo wada shaqaynayeen, waxaannu ku booriyay in qaranku uu halkaa ka sii taaba-gallo.
Madaxweynuhuna wuu u duceeyay murrashaxa madaxweynaha ee xisbiga mucaaridka ah ee Waddani, ahaana guddoomiyihii hore ee golaha Wakiillada iyo murrashaxiinta kaleba,”ayuu yidhi Afhayeen Xuseen Dayr.
Waxa kaloo uu ku tilmaamay C/raxmaan Cirro in uu yahay shaqsi taariikh qiimo leh kaga jira Somaliland, isla markaana uu wax badan u soo qabtay dalka; “Taariikh qiimo leh ayuu qarankan kaga qoran yahay, qaranka Somaliland iyo ummaduba waxay aad ugaga mahadnaqayaan C/raxmaan Cirro wixii uu u soo qabtay. Madaxweynuhu wuxuu ku booriyay in danta guud ee qaranku ay mar walba mudnaanta koowaad yeelato,”ayuu yidhi afhayeenku.
Dhinaca kale guddoomiyaha xisbiga mucaaridka ah ee Waddani C/raxmaan Cirro, ayaa sheegay in kulanka u madaxweynaha la yeesheen u jeeddadiisu ahayd in uu ku wargeliyo in uu shalay banneeyay kursigii guddoomiyenimo ee golaha Wakiillada, waxaannu yidhi; “Maanta (shalay) oo ay bishu tahay 2-da August 2017-ka, waxaan banneeyay jagadii guddoomiyenimada ee golaha Wakiilladda jamhuuriyadda Somaliland, iyadoo doorashadii madaxtooyadu ay inoo qabsoomi doonto 13-ka bisha November ee sannadkan 2017-ka.
Sidaa darteed, maadaama aan qaranka muddo dheer xil u hayay waxaan soo booqday aniga iyo shir-gudoonkuba madaxweynaha qaranka, oo aanu ku wargelinayay in aan banneeyay xilkaas iyo dar-daaran wixii uu na sii farayay-ba.”
C/raxmaan Cirro, wuxuu intaas ku daray; “Kulankii aanu madaxweynaha la yeelanay si wanaagsan ayuu noogu dhammaaday, waanan is la fahamnay sidii aanu awalba u wada shaqayn jirnay hawlaha qaranka in looga wada shaqeeyo. Iyadoo mudnaanta la siinayo danta qaranka iyo in doorashadu insha Allaah wakhtigeedii ay innoogu qabsoonto.”
Waxa kaloo uu guriga madaxtooyada ku booqday Marwada koowaad ee Somaliland, Marwo Aamina Waris Sh. Maxamed Jirde, waxaanay u jeedisay dardaaran kooban balse muhiim ah, waxaanay tidhi; “Kollayba adiga kuma ogin degdeg iyo go’aan dalka waxyeelaya iskana ilaali wixii khalad kugu riixaya.”
Dawannews Hargeysa office