Hargaysa (Dawan)- Wasaaradda Maaliyadda Jamhuuriyadda Somaliland ayaa ka jawaabtay eedo been abuur ah oo uga yimid xisbiga Waddani oo sheegay in $200,000 wasaaraddu xisbiga Kulmiye ka siisay kastmadda Kalabaydh iyo Saylac.
Wasiiru-dawlaha wasaaradda maaliyadda Somaliland Yuusuf Axmed Umal (Yucuboole) iyo Axmed C/laahi Oomaar, oo ah agaasime ku-xigeenka waaxda kastmadda ee wasaaraddda maaliyadda oo shalay shir jaraa’id ku qabtay xarunta wasaaradda ee magaaladda Hargaysa, ayaa sheegay in aanay waxba ka jirin eedaynta ka soo yeedhay af-hayeenka xisbiga Waddani.
Waxaanay masuuliyiinta wasaaradda maaliyadu eedaha Waddani ku tilmaameen kuwo aan sal iyo raad toona lahayn, isla markaana aanay jirin lacag la dhigo kastamadda balse lacagta kastamadda maalintii ka soo baxda lagu shubo Baananka.
Wasiirul dawlaha Maaliyada Yuusuf Xasan Umal, ayaa sheegay in aanay jirin lacag kastamada Kalabaydh iyo Saylac looga saaray xisbiga Kulmiye, waxaanu u soo jeediyay xisbiga Waddani in ay ka waan toobaan eedaha aan xaqiiqada ku salaysnan. Waxaanu yidhi “Waxaan jawaab ka bixinayaa hadalo ka soo yeedhay af-hayeenka xisbiga Waddani, taasoo uu ku sheegayay in 200, 000 kun oo doolar qasnada kastamada Saylac iyo Kalabaydh looga saaray xisbiga Kulmiye.
Arrintaas wax ba kama jiraan, waana arrin ku cusub siyaasadda Somaliland in la yidhaahdo kastam ayaa lacag lagala baxay. waxaynu maqli jirnay xukuumaddu lacag ayay ka saartay bangiga dhexe, waana arrin ceeb ku ah dawladnimadeena.
Lacagta ka soo xeroota kastamadda, waxaa maalin walba lagu shubaa (dhigaa) bangiyada dawladda ma na jirto lacag lagu kaydiyo kastamadda, waana in xisbiga Waddani uu ka waan toobo eedaha aan xaqiiqada ku salaysnayn”.
Wasiirku waxa kaloo uu sheegay in aanay xisbiga Waddani aqoon u lahayn nidaamka dawladnimo iyo sida loo soo xereeyo canshuurta laga qaado ganacsatadda, isagoo xusay in aanu Waddani waxba kala socon nidaamka dawladnimo ee dalka ay doonayaan in ay hogaamiyaan.
“Waxaanu filaynay in xisbiga Waddani iyo xildhibaankuba (Buubaa) in ay aqoon u leeyihiin sida loo ururiyo lacagaha iyo siday u soo xerooto canshuurtu, laakiin waxaad moodaa in aanay garanaynin xisbiga Waddani wadanka ay doonayaan in ay hogaamiyaan siduu u shaqeeyo nidaamkiisa dawladnimo” ayuu yidhi wasiir Yucuboole.
Geesta kale agaamise ku-xigeenka Waaxda kastamadda ee wasaaradda Maaliyadda Axmed Cabdilaahi Oomaar, ayaa sheegay in af-hayeenka xisbiga Waddani looga baahan yahay cadaynteedda halka uu ka keenay in lacag lagala baxay kastamadda Kalabaydh iyo Saylac.Waxaanu yidhi “Waa wax aan waxba ka jirin in kastamka kalabaydh iyo ka-Saylac lagala baxay lacag. Kastamka kalabaydh lacagta lagu qabto maalin kasta waxaa lagu xareeyaa baanka Gabiley, waxaana ka markhaatiya xisaabiyaha jooga waxa kaloo markhaatiya ganacsatadda cashuurta laga qaado (Qaadleyaasha) waana been, waana danbi laga galay shaqaalaha noo jooga kastamadda, waana in cadaynta ay keento cidii waxaas tidhi.”
Dawannews Hargeysa office