By: Khadar M. Dhako
Hargaysa(Dawan)- Wasiirul-dawlaha wasaaradda Arrimaha Dibada Jamhuuriyadda Somaliland Maxamed Mixile Boqore, ayaa sheegay in goob joogeyaal caalamiya oo dalal badan oo caalamka ah ka socdaa ay iman doonaan doorashada madaxtooyada Somaliland muddaysan 13-ka November ee sannadkan.
Wasiir Maxille, waxa kaloo uu sheegay in doorashada Madaxtooyada Somaliland ay iman doonaan goob joogeyaal caalamiya oo la socon doona qaabka ay u dhacda.
“Waxaa la casuumay 60 goob jooge oo iman doona doorashadda Madaxtooyada Somaliland oo ay ka mid yihiin wadamada Sweden, Maraykanka, Ingiriiska, Carabta iyo wadamo kale. Waanan ka wada hadalnay komishanka doorashooyinka qaranka wixii goob ah ee imanaya doorashadda ma hor joogsanayno, marka hore waa in nalala soo socod siiyo in ay imanayaan,” ayuu yidhi Mixille Boqore oo shalay u waramay warbaahintu,
Wasiirku waxa kaloo uu intaas ku daray in doorashada Somaliland ay ka duwan tahay tii 8-dii Bishii hore ka dhacday Kenya,Waxaannu yidhi; “Kenya inagu la mid ma nihin, waanan ka fiicanahay doorashadeena miiska dushiisa ayaa lagu tiriyaa, saddexda xisbi qaran iyo komishanka doorashooyinka ayaa tiriya nin waliba-na wuu garanayaa wixii uu helay. Doorashadeennu ma aha wax laga shakiyo cidii shakisani waa yeelkeed ama xisbi mucaarida ha ahaato ama xisbi muxaafida ha haatee. Kenya marka waraaqaha doorashada la tiriyo ayaa xarunta dhexe lagu soo tuuraa waraaqo kale. markaa waxbaa luma doorashadeena doorasho la mid ahi ma jirto.”