Hargaysa (Dawan):- Xukuumadda Somaliland, ayaa digniin adag u dirtay cid kasta oo booliska cay gef ah kula kacda, isla markaana warbaahinta cay u marisa ciidanka booliska iyo madaxdiisa.
Wasiir ku Xigeenka Wasaarada Arrimaha gudaha Somaliland Maxamed Muuse Diiriye waxa kale oo uu sheegay in ciidanka boolisku ay yihiin kuwa lagu hurdo ee dadka illaaliya ee hadh iyo habeenba u seexan waayay, una soo jeeda sugidda ammaanka dadka iyo dalka gudihiisa, loona baahan yahay in lala shaqeeyo oo aan laga caayin warbaahinta.
Waxa kale oo wasiir ku xigeenku waxba kama jiraan ku tilmaamay warar uu booliska ka sheegay wariye Cali Seenyo oo wasiirku ku eedeeyay in uu gef ka galay ciidanka booliska isla markaana ka been sheegay in loo diiday fiisaha dal ku galka. Halka wasiirku tilmaamay in loo diiday in ay muuqaalo ka duubtaan aataar ku duugan degmada Saylac oo uu ka mid yahay masjidka Qiblotaynka ah ee magaalada Saylac oo uu caddeeyay in wariye Cali Seenyo uu doonayay in isaga oo aan fasax u haysan oo wata dad aan la garanayn waxay shaqadoodu tahay in ay halkaa muuqaalo ka duubtaan.
Wasiirka oo ugu horrayn ka hadlaya sida aanay xukuumaddu ugu dul qaadanayn in ciidamada kala duwan ee dalka in laga caayo warbaahinta, ayaa yidhi. “Guud ahaan ciidamada waa waxa dadku ku hurdaan ee Nabadgalyada ilaalinaya, gaar ahaan Ciidanka Boolisku waa kuwa dadka isku haya ee kala haya, waana kuwa ilaaliya nabada ee xuduudaha u jooga mana geyo ciidanka Boolisku cay. Waxaanu leenahay gaf ayuu ka galay Ciidanka Booliska Cali Seenyo, wax loo dul qaadan karana maaha, mana aqbalayno in ciidanka booliska la caayo.”
Wasiir ku xigeenku isaga oo hadalkiisa sii watay waxa uu intaasi raaciyay “Taliyaha Ciidanka Booliska ninka caayay waxa uu caayay Ciidanka Booliska. waxaanu sitaa derajadii madaxweynuhu siiyay sida aan shaadhka Booliska loo taaban karin ayaan dhaliil looga sheegi Karin. Waana laga caban karaa Ciidanka Booliska waa bini aadam laakiin lagama caayo warbaahinta”.
Wasiirku waxa uu sheegay in ay ahayd Cali Seenyo inuu soo maro hay’adaha u xil saaran masaajidka Qiblataynka. waxaanu yidhi “Haddii Barnaamij Saab Tv duubanayo wariyeyaasha Hargaysa joogaa in ay tagaan ayay ahayd laakiin in la soo kaxaysto dad aanaan garanayn waxay u socdaan in Cali Seenyo fiise u soo qaato oo tiim soo kaxaysto may ahayn, cidda u xil saaran in laga fasax qaato ayay ahayd, waxaanay ahayd in loo yimaado masuuliyiintaa arintaas u xil saaran. waxaanay wadeen oo sawirayeen aasaar cidda la socotay yay ahayd ma wariyeyaal ayay ahaayeen ma Ganacsato ayay ahaayeen, sow may ahayn intay yimaadaan Hargaysa oo ay sheegtaan waxay doonayaan fiisaha dal ku galka looma diidin ee waxa loo diiday waxa laga duubayay Saylac”.
Dawannews Hargeysa office