Berbera(Dawan)maamulka gobolka saaxil iyo ka degmadda berbera ayaa ka xog-warramay socdaal ay ku soo mareen degmooyinka gobolka saaxil.
Ugu horeyna waxa safarkaasi iyo ujeedooyinkiisii ka hadlay xoghayaha dawladda Hoose ee degmada Berbera Cabdikariim Aadan Siciid oo sheegay in socdaalkoodan oo qaatay muddo toddobaad ahi uu ahaa mid ay ugu kuur gelayeen mashaariicdii 2019-ka oo ay dhamaystirayeen iyo xadhig ka jaristoodii iyo u kuur-gelida xaaladda nololeed iyo baahida dadka ku nool degmooyinka gobolkaasi Saaxil hoos yimaada.
Waxaanu tilmaamay Xoghayuhu in ay safarkooda kusoo mareen dhamaan degaanadda hoos yimaada gobolka Saaxil, Barigiisa, Galbeedkiisa iyo Koonfurtiisaba, safarkaasina uu ugu soo dhamaaday nabad qab.
Waxa iyaguna safarkaasi ka hadlay guddoomiyaha Golaha degaanka degmada Berbera ahna maayirka magaaladaasi Cabdishakuur Maxamuud Xasan Ciddin iyo guddoomiyaha gobolka Saaxil Axmed Cismaan Xasan oo ka waramay waxyaalihii ay kusoo arkeen safarkoodaasi ay kusoo mareen degaamadda hoos yimaada gobolka Saaxil.
Waxaanay labadan masuul sheegeen in safarkoodu uu salka ku hayey dhamaystirka mashaariicdii 2019-ka iyo qorshaha 2020-ka, sidoo kalena ay u kuur gelayeen xaaladdaha ay ku nool yihiin bulshada degaanaddasi, waxaanay tilmaameen in ay doonayaan in ay wax kala qabtaan dadkaasi ay booqashada ugu tageen baahiyaha aas aasiga ah ee ay ugu horeeyaan Biyaha, Caafimaadka iyo waxbarashada.