Diyaariye. Saleeban Kalshaale
Ceebtaada Qiro..Maxamed Cali Diiriye
Maansada Ceebtaada Qiro waxa curiyey Abwaan Maxamed Cali Diiriye oo kamida Hal-abuurka Jamhuuriyadda Somaliland, waxaanu kaga maansooday horumarka Dawladnimo, dhismaha Qaranka dhidibo adag ku taagan iyo nabad-gelyada dalkeenu ku naaloonayo, isagoo dhinaca kalena tilmaan iyo tusaale kaga bixinaya xaqiiqada iyo xaalada qalafsan ee ku gedaaman dalka aynu deriska nahay ee Soomaaliya oo uu tixda dhexdeeda ku sheegayo in iyagoo toodii u taag la’ ay hagar-daamo iyo qujo-qujayn ku hayaan Somaliland.
Tixdan oo ah maanso aad xambaarsan qisooyin iyo hoga-tusaaleyaal badan, ayaanu qormadeena maanta ee Dhaqanka iyo Suugaanta idiinku soo gudbin doonaa qaybteeda koowaad, iyadoo haddii alle yidhaah cadadka dambena aanu qaybta labaad idiinku soo gudbin doono.
Waxaanu Maansada ku bilaabay sidan:
Somaliland waa qaran
Calan baw qotoma
Qaadirkii alliyo
Rasuul lagu qoroo
wixii qoonsiyaba
Qaynuun jiriyo
Dastuur qoran ayaa
lagu kala qancaa.
Qaydbaa dhex yaal
Nabad-baa qaxwiyo
quudba lagu cunaa
Qarni laba kunaanu
Qaaradaha dhexnaal.
Qool Gahaydhle doog
Qoyanihii ku yaal
talo qiimo iyo
Qaayo lagu daroo
Qumanbaa wadoo
Qorshaha u degt=oo
Qasti loo dhanyiyo
Qiyaas wada jirtaa
qaban qaabiyoo
ku xariiqay qalin.
Waa qiil shacbigu
Qoondaystayoo
Banbo qaraxda iyo
Qori lama sitee
Qof waliba danbuu
Qabsadaa dhib li’i.
Qaaradaha dunida
qayrkood wuxuu
qabsaday arkeen
Tan (Somaliland) qurbaa u go’doo
Dhiigbaa u qubtoo
Qosol laguma helin.
Qaybku waa Alloo
Qadaa qurus risiqu
Qaadir uu baxshoo
Qoro uu ogyee
Fulaa qoor dhigtee
Geesi quudhsi diid
Qatanbaa ka wacan.
Sharafbaa qofnimo
Quman lagu noqdaa
Duday qiilka madhan
Qoondada madow
Quruxbaan ka biday.
Soomaali quban
oo Qaran heshaa
Waatii waa Qac yidhi
iyo Qorax iftoo
Waan qaboobi laa
Qorfa dhiilaliyo
Qalwuu Yuururaa
Aanu qaar sariyo
Qoorta kala baxayn.
Siyaasadda qariban
ee qaawanta ah
qardoof keenigii
qarka shishe xigayna
Ina Cumar qabsayo
Ila qaad xumaa.
Quwadii kalena
Qarnigaa Afrika
iyadaa qasnoo
Qabso Doorashoo
Qanacbay ku tidhi.
Mase qaadanine
qumanuhu wuxuu
quudayaa haddana
mar kaluu qabtee
Maskax quudhi waa
haku quusatee
diirka uga qaad.
Inaan qor ugu hadhin
qaadan maayo talo
Qaladkaa u saxoo
Qurjad meel ku maqan
Qur’aan lagu akhriyey
qalbi uma lahee
Qaafilbay ku tahay.
qab qab dhaafaybaa
Qaran lagu tebaa
Qaaradaha dunida
Waxa qoran inuu
Dawlad quus ka yahay
qarbiguna nacoo
qab xumada wuxuu
Quudaa ruushka iyo
Jayne yaalla qoor.
Hooyada qaxdee
laga qaatay wiil
Qooriga Xabuush
Qudhu kaga go’deen
wali quusasanina
Quruuruxa ka badan
waana qoon bugto ah
Iyo qaan ku maqan.
Dadku maaha qoran
Qulux laga dhigtee
Waa adoon qofoo
Loox Maxfuud ku qoran
Nin Qayuur ahbaa
Qabyadiisa dhiman
ee Qolqolkiisa taal
qabsadoo gutee
qayrkaa wuxuu qabsaday
qabo baa la yidhi.