Baadari Desman Tutu, oo ku guuleystay abaal marinta biladda Nabadda “Nobel”, kaas oo gacan ka geystay soo afjaristii nidaamkii midab takoorka dalka Koonfur Afrika, ayaa geeriyooday isaga oo 90 sano jir ah.
Madaxweyne Cyril Ramafosa, ayaa sheegay in dhimashada baadariga ay astaan u tahay murugo kale, oo la xidhiidha sagootinta mid ka mid ah jiil Koonfur Afrika wax weyn uga dhignaa.
Wuxuu intaa ku daray in Baadari Tutu uu qeyb weyn ka ahaa in dalkaasi laga xoreeyo nidaamkii midab takoorka ahaa.
Tutu wuxuu ka mid ahaa dadka sida weyn looga yaqaaney dalka Koonfur Afrika gudihiisa iyo dibaddiisaba.
Sanadkii 1984-tii, waxaa la guddoon siiyey Tutu abaal marinta nabadda ee Nobel-ka, doorkii uu ka qaatey halgankii lagu baabi’inayey nidaamkii midab takoorka ahaa.
Dhimashada Tutu ayaa ku soo beegantey toddobaadyo un kadib, markii uu geeriyoodey madaxweynihii ugu danbeeyey ee dowladdii midab takoorka ee Koonfur Afrika, FW Di Kalar, oo ku dhintay dada 85 sano jir.
Mu’asasadda Nelson Mandela ayaa sidoo kale codkeeda ku biirisay tacsida Tutu. ” Wuxuu gacan ka gaystay halganka ka dhanka ahaa cadaalad darrada gudaha Koonfur Afrika iyo dibeddaba. Wuxuu ahaa bani’aadam karti leh, mufakarna ah.”
Ka dib markii uu Mandela noqday madaxweynaha Koonfur Afrika sanaddii 1994, Tutu ayaa u magacaabay inuu hoggaamiyo guddiga Runta yo Dib U Heshiisiinta ee loo abuuray inay baadhaan dambiyada la gaysteen xilligii uu dalkaasi ka jiray midab takoorka.
Muxuu ka yidhi Dhibka Falastiiniyiinta
Ma ahayn shakhsi la gabbado afkaartiisa. Bishii April 1989, wuxuu booqday magaalada Birmingham ee dalka UK, wuxuu cambaareeyay waxa uu ku tilmaamay “labada qaran ” ee ka jirta Britain, isaga oo sheegay in dad badan oo madow ah ay ku jiraan xabsiyada dalkaasi.
Wuxuu sidoo kale mar ka cadheysiiyay Israa’iil markii uu booqday dhulkaas isaga oo is barbardhigay Carabta ku nool Daanta Galbeed ee la haysto iyo Qasa iyo dadka Koonfur Afrika soo maray midabtakoorka.
Wuxuu sheegay in aanu fahmi karin sida Yuhuudda oo soo maray dhib badan ay isla dhibkaasi u marsiin karaa falastiiniyiinta.
