SIRTA NOLOLSHA iyo ABWAAN HADRAAWI Qayntii 6-aad
Subax noolba dhiig daata
Xadhig iyo silsilad shiilan
Allow yaan sinnaanteeda
Ku beddelin saraar oodan
Iyo seere wiil qaytey
Dadka saran guudkeeda
Yaan ka dhigin sabool qaawan…
Akhristeyaal qormadeena Dhaqanka iyo Suugaanta todobaadkan waxa aynu ku sii ambaqaadaynaa tixda qiimaha badan ee SIRTA NOLOSHA oo aanu idiinka soo dheegnay diiwaanka badweynta Suugaaneed ee Abwaan Maxamed Ibraahim Warsame (Hadraawi).
Tixdan oo aynu ku soo qaadanay 5aad qormo ee ugu dambeeyey ee barmaamujka dhaqanka iyo Suugaanta, sidii aynu qormooyinka hore ku soo aragnayna Abwaanku wuxuu curiyey sanadihii sideedtamaadkii, sidoo kalena waxay ka mid ahayd suugaanta ugu qotada dheer, xigmada iyo xiisahana badan. Waxa uu ku hogga-tusaaleeyey qaab-nololleedka bulshada, waxyaabaha ka reebban iyo waxa la gudboon.
sidaasi awgeed, waxa aynu toos u guddo gelaynaa Maansada oo aynu qormadeena maanta iyo kuwa soo socdaba ku soo qaadan doono haddii alle idmo:
Allow yaa wax suureeya
Salka dunida yaa dhawra
Iyo seeska jiriddeeda
Wacanaa sansaankeedu
Badanaa sudaaddeedu
Saxanaa hannaankeedu
Allow yaan sugnaanteeda
Saymiyo u rogin duullan
Subax noolba dhiig daata
Xadhig iyo silsilad shiilan.
Allow yaan sinnaanteeda
Ku beddelin saraar oodan
Iyo seere wiil qaytey
Dadka saaran guudkeeda
Yaan ka dhigin sabool qaawan
Iyo soobir caydh jooga
Erey sami wuxuu gooyo
Allow yaan ku jarin soodhka
Garashada ka dhigan seefo.
Abwaanku meerisyadan sare wuxuu sawir kaga bixiyey samaanta adduunka iyo wanaagyada ku gaafan. waxaanu ku lifaaqay isagoo isticmaalaya ereyo duco ah inay jirto baahida loo qabo inay wadcigaa wanaagsan ku sii waarto. dunidu mar waxay noqon kartaa wadar-noosha caalamka, haddana waxa lagu micnayn karaa Somaliland.
“Allow yaa su’aashaasi
Sida ay u tahay yeela”
Maansanyahanku isagoo sii wada waxa uu dardaaran u guntay Sahra, isagoo u dardaarmay inay rabbi weynidiisa iyo abuurtiisa oo kaliya adeecdo, waana sida looga baahan yahay qof kasta oo muslim ah:
Heedhee Sahraay heedhe
Dhulka iyo wixii saaran
Sare iyo wixii laalan
Inta sudan intii seemman
Waxa jira sir iyo caadba
Rabbi qudha sax weedhiisa
Sida uu ku yidhi buuxi
Waxa hadhay salka iyo baarka
Inta sool qarsoon joogta
Inta seel xidhxidhan jiifta
Inta saydha waabayda
Maroodiga siddaa dheer leh
Wiyil iyo sahboodkeeda
Inta laga subxaanaysto
Kolay tahay libaax sayn leh
Marka aad Sahraay meel fog
Uga suul-dhabaaleyso
Deg-deg inay sujuuddaada
Suxullada dhigtaan weeye!
Sidashada awooddaasi
Sahal iyo wax fudud maaha
Qofba waa garadkiisa.
Awooddaha Illaahay ee Badda, roobka , Buuraha iyo danabyada, Onkodka iyo wixii la hal maala ayuu xusuusiyey Abwaanku Sahra iyo umadda kale, waxaanu yidhi sidan soo socota;-
Heedhee Sahraay heedhe
Badda iyo sulaaqeeda
Iyo buurta saysaaban
Onkodkiyo sawaxankiisa
Salowgiyo jibaadkiisa
Danabkiyo salsalihiisa
Sarka dhabanka duufaanka
Ha ka didin sawaxankooda
Duni kuu sakhiran weeye
Sayid baad u tahay caana
Suubaali oo layli
Ku sasabo aqoontaada
Senge iyo ka dhigo doonni
Sallo iyo ka dhigo oori.
hibada hadalka iyo suugaantu waa wax alle bixiyo’e Abwaan Maxamed Ibraahim Warsame oo loo garan og yahay Hadraawi wuxuu kamid yahay maanso-curiyeyaasha wax ka tusa bulshada fogaan-aragga ugu dheer. waa sababta maanso kasta oo uu curiyey quluubta dadka ugu duxdo iyadoo raacaysa tuumo ku talaallan dareenka qofka.
Sarbeebtu waa suuggada gabayga, maansada iyo geeraarka qofka uu ka tiriyo baddaha suugaanta, sidaas darteed ayey tix kasta oo hadraawi tiriyaa u leedahay sarbeeb, humaag iyo dhex-galeyaal.
Bal dhuggo mar kale isagoo sii wada maansada:
Gabadh weeye caad saran
Badi saayiraadeeda
Iyo laab salaaxeeda
Guro saadka guudkeeda
Iyo sahayda uurkeeda
Kordhi noole soorkeeda
Iyo baahi saarkeeda
Hubi nabad sugnaanteeda
Iyo sabo negaanteeda
Ha ku deyin xannun saaqa
Ha ku badin saqaaf ciiddan
Suluf iyo colaad waarta
Ha ku saaxin naabaalka
Iyo sulubka baaruudda
Ha ku didin sabbeeyaanka
Sabareynka boodbooda
Iyo sukhula naareedka
Ha la dhicin sawaariikhda
Iyo saanadaha miiggan
Ha sumayn macaankeeda.