Hargeysa(Dawan):-Qaar ka mida Guddoomiyeyaasha Ururada cusub ee Siyaasadda ee dalka lagaga dhawaaqay ayaa shalay kulan la qaatay Gudida Diwaangalinta Ururada Siyaasada iyo Ansixunta Axsaabta Qaranka.
Guddoomiyaha Urur Siyaasadeedka Horseed Cabdilaahi Xuseen Iimaan Cabdilaahi Darawal ayaa faahfaahin waxyaabihii ay wadahadleen gudida diwaangalinta Ururada Siyaasada.Waxaana uu yidhi”Waxaaanu shir la yeelanay Gudida Diwaangalinta Ururada Siyaasada,waxaana uu ahaa shirkaasi mid aanu warbixin ku kala qaadanaynay gudida.waxaana ay noo sheegeen in guddi ahaan in dhakhso u bilaabayaan Diwaangalinta Ururada Siyaasada si fiicana wuu noogu soo dhamaaday kulan kaasi,”.
Guddoomiyaha Urur Siyaasadeedka Daljir Prof.Cabdi Cali Jaamac ayaa waxa uu sheegay waxa ay ka wadahadleen gudidan.Waxaana uu yidhi”Waxa la doonayaa in gudidan noqoto guddi madaxbanaan taas ayaana ugu muhiimsan,taas dadka danaynayaan,”.
Guddoomiyaha Urur Siyaasadeedka Rajo Cabdilaahi Axmed Maxamed Cabdilaahi Dahab ayaa waxa uu sheegay in Gudida Diwaangalinta Ururada Siyaasada ay u sharaxeeen sida ay doonayaan in gutaan shaqada loo igmaday.Waxaana uu yidhi”Kulankan aanu la qaadanay afartii xubnood ee la ansixiyay ee gudida diwaangalinta Ururada Siyaasada waa mid hordhaca, waxaana ay noo sharaxeen sida ay doonayaan in ay wax u wadaan oo shaqada la dhamaystiro marka la ansixiyo saddexda xubnood ee ka dhiman gudida Diwaangalinta Ururada Siyaasada,”.
Sidoo kale Guddoomiyaha Siyaasadeedka Gurmad Rooda Cabdi Muuse ayaa waxa ay sheegtay in kalsooni buuxda siiyeen gudida Diwaangalinta Ururada Siyaaasada.Waxaana ay tidhi”Kalsooni buuxda ayay Urur ahaan na siiyeen waxaana farxad noo ah in afarta xubnood ahaayeen aqlabiyadii Ururka Diwaangalinta Ururada Siyaasada si habsamiya ayaanay shaqadii u bilaabeen,”.