In ka badan 20,000 oo askari oo Ruush ah ayaa lagu dilay dagaalka ka socda Ukraine tan iyo bishii December, sida ay qiyaastay warbxin Maraykanku soo saaray.
80,000 oo kale ayaa la dhaawacay, afhayeenka Golaha Amniga Qaranka John Kirby ayaa sheegay, isaga oo soo xiganaya sir cusub oo la shaaciyay.
Dadka dhintay kala badh ayaa ka tirsan shirkadda calooshood u shaqeystayaasha ee Wagner, kuwaas oo weerar ku qaaday bariga magaalada Bakhmut.
Ruushka ayaa tan iyo sanadkii hore isku dayayay in uu magaaladan yar ku qabsado dagaal aad u fool xun.
Moscow ayaa hadda gacanta ku haysa inta badan Bakhmut, laakiin ciidamada Ukraine ayaa weli gacanta ku haya qayb yar oo magaalada ah oo ku taal galbeedka. Dagaalkan oo ahaa mid aad u xooggan ayaa labada dhinacba u yeeshay muhiimad weyn oo astaan u ah.
Saraakiisha Ukraine ayaa sidoo kale sheegay in ay dagaalka u isticmaalayaan in ay ku dilaan inta ugu badan ee ciidamada Ruushka ah, isla markaana ay gabaad ka dhigtaan kaydkooda.
“Isku daygii Ruushku ku doonayey in uu ku qabsado gobolka Donbas waa uu ku fashilmay [gobolka intiisa badan] kaas oo ay ku taal Bakhmut,” Mr Kirby ayaa u sheegay suxufiyiinta. “Ruushku ma awoodo inuu qabsado dhul istaraatiiji ah oo muhiim ah.
“Waxaan ku qiyaaseynaa in Ruushka inuu soo gaadhay in ka badan 100,000 oo dhaawac ah, oo ay ku jiraan in ka badan 20,000 oo lagu dilay hawlgal,” ayuu raaciyay.
Khasaaraha ka dhacay Bakhmut ayaa ka dhigan khasaarihii tan iyo bilowgii Disembar, marka loo eego tirooyinka xogta Maraykanka.
“Arrinka xogtiisa ayaa ah in isku daygii Ruushka ee gobolkaa uu dib u dhacay ka dib bilo dagaal iyo khasaare aan caadi ahayn,” ayuu yidhi Mr Kirby.
Waxa uu intaa ku daray in aanu bixinaynin qiyaasaha khasaaraha Ukraine sababta oo ah “Ukraine waa dhibbane Ruushkuna waa gardarada”.
BBC ma awoodo inay si madax banaan u xaqiijiso tirooyinka la bixiyay, Moscowna kama hadlin.
Qabsashada magaaladan ayaa Ruushka u soo dhawaynaysa yoolkiisa ah in uu maamulo guud ahaan gobolka Donetsk oo ka mid ah afar gobol oo ku yaalla bariga iyo koonfurta Ukraine oo uu Ruushku qabsaday bishii Sebtembar ee la soo dhaafay ka dib afti si weyn loogu cambaareeyay meel ka baxsan Ruushka oo lagu tilmaamay mid been abuur ah.
Falanqeeyayaasha ayaa sheegaya in Bakhmut uu leeyahay qiimo istiraatijiyadeed oo yar, laakiin wuxuu noqday barta ugu weyn ee taliyayaasha Ruushka, halkaas oo ku dhibtooday Ruushku inay war kasta oo wanaagsan u gudbiyaan Kremlin-ka.
Kooxda calooshood u shaqeystayaasha ah ee Wagner – oo si weyn u adeegsata dambiilayaasha oo caan ku noqday hababkooda ka baxsan bini’aadantinimada – ayaa udub dhexaad u noqday weerarkii Ruushka uu ku qaaday Bakhmut.
Hogaamiyeheeda, Yevgeny Prigozhin, ayaa sumcadiisa iyo tii ciidankiisa gaarka ah, ku tilmaamay qabsashada magaalada.
Balse dhawaan ayuu ku hanjabay inuu ciidamadiisa kala bixi doono Bakhmut.
Wareysi dhif iyo naadir ah oo uu siiyay nin caan ah oo ku hadla afka dagaalka Ruushka, waxa uu wacad ku maray in uu ka bixi doono dagaalyahanada Wagner haddii aan la siinin saanad ay aad ugu baahan yihiin wasaaradda difaaca Ruushka.
Dagaalyahannada Wagner ayaa dib loo geyn karaa dalka Mali, ayuu ka digay.
Inta badan waxa ay isku dhaceen wasaaradda difaaca ee Ruushka intii uu dagaalka socday, isaga oo ku eedeeyay saraakiisha in aanay siinin dagaalyahanadiisa taageero ku filan.
Mr Prigozhin ayaa sidoo kale ugu baaqay warbaahinta Ruushka iyo hoggaanka militariga inay “joojiyaan beenta ay u sheegaan shacabka Ruushka” ka hor weerarka la filayo inuu ka dhaco Ukraine.
“Waxaan u baahanahay inaan joojino beenta aan u sheegayno shacabka Ruushka, inaan u sheegno wax walba waa sax,” ayuu yidhi.
Wuxuu ammaanay ciidamada Ukraine “howlgallada millatari ee saxda ah ee wanaagsan” iyo taliska.
Jeneraal sare oo u dhashay dalka Ukraine ayaa Isniintii sheegay in weeraro rogaal celis ah ay ciidamada Ruushka kaga saareen qaar ka mid ah fariisimaha ay ku leeyihiin Bakhmut, balse xaaladdu weli waa mid adag.
Cutubyo cusub oo Ruush ah, oo ay ku jiraan kuwa paratroopers iyo dagaalyahannada Wagner, ayaa “si joogto ah loogu dirayaa dagaalka” inkasta oo ay la kulmeen khasaare xooggan, Gen Oleksandr Syrskyi, oo ah taliyaha ciidamada dhulka ee Ukraine, ayaa ku sheegay Telegram.
Laakin cadawgu ma awoodo in uu la wareego magaalada,” ayuu yidhi.