Ficil iyo fal kasta oo la sameeyaa waxaa looga midho-dhaliyaa
joogteyn,Joogteyntaas oo ka turjunta wax-qabad. Wax-qabadkaas oo noqda
horumar waara oo la taaban karo, waxaa fajac iyo amakaag ah, in ummad
Sheeganeysa Diin iyo Dhaqan hadana fahmi kari la’a in nadaafadu tahay
Iimaanka badhkii, hadana ka dhoohan falka iyo ficilka loo baahaan yahay
In nadaafadu noqoto alifka iyo abjadka ummadan oo ay kaga duwanaato
Kuwa kale ee aan Diinta lahayn, ma wax caqligga oggolaan karaa
In dadkii gaalada ay kaa nadaafad iyo bilic bataan?
Mise Diintaadu waa dhallanteed? Hadii aynu dib isu jaleecno ama dib isu eegno,
waxaynu taaban kareynaa, in waxaynu leenahay iyo wax-qabadkeenu
kala fogyihiin oo ay yihiin kaaf iyo kala-dheeri, waxaan marag iyo markhaatiba
u baahneyn inaynu awoodi weynay, inaynu billicda magaalada iyo bed-qabka
Deegaanka aynu ku noolnahay ka shaqeyno oo ay ugu horeyso nafteena,
guryaheena,xafiisyadeena,cisbitaaladeena iyo dhammaan wadanka quruxdiisa.
Bal ka warama quruxda la sheegaba haddii ay tahay nadaafada?
Waa hubaaloo, shaki kuma jiro in quruxda la sheegaba ay tahay
nadaafada iyo faydhowrka cuntadeena oo soo galeysa bed-qabka
Qofka,Qoyska iyo Qaranka.Si kastaba ha snoqotee, waxaa haboon oo mudan
in lays dultaago, in wadankeenu yahay wadan nadaafadiisu
aad u liidato oo ay ugu wacan tahay wacyi la’aanta shacabka,
si kasta oo loo nadiifiyaa ama loola tacaalaaba, hadii kolkii la nadiifiyo
Isla markiiba la uskakeynaayo waa hal bacaad lagu lisay.
Kolkaa, waxaa haboon ama quman in wacyiga nadaafadeed
Ee shacabka kor looqaadaa oo goorawlba iyo goobwalba
Loogu cel-celiyaa in nadaafadu tahay shayga ugu muhiimsan
Ee waxtarka u leh bed-qabka qofka,qoyska iyo qarankaba.
Taasina waxay ku suurtagaleysaa, joogteynta wacyi-galinta
Nadaafadeed oo ah dan guud oo ka dhaxeysa ummada,
Ka shaqeynta masuuliyadeed ee shakhsi ayaa ah wacyiga
Ugu sareeya ee lagu gaadhi karaayo guulaha wacyigalineed
Ee qaranka, waxa ugu muhiimsan ee in ummada la baraa
Ay biyo kama dhibcaan tahay in shakhsi walba ay masuuliyad
Gaar ah ka saaran tahay nadaafada guud iyo ta gaarka ah.
Iyadoo loo sii maraayo wacyigalinta halku dhigeedu yahay
“Nadiifi waa wax wanaagsan laakiin ha uskageyn baa kasii wacan”
Tanina waxay ku imaneysaa in shakhsi walba ay gaadho
Fariinta ama wacyiga in uu tiisa meel saaro, oo fahamkiisu
Noqdo mid bisel ama u nugul in uu halka uu kaga beegan yahay
Kasoo baxo, isagoon cidi dirin, is-dirida ama iskaa wax-u- qabsiga
Ayaa ah horumar ay ummadi gaadho ka ugu sareeya ee ay ku
Faanto, mana noqdo waxyi kusoo degga shacabka ee waa
Heer la gaadhsiiyo iyadoo loo maraayo marinadda wacyigalineed.
Wacyigalintaas oo noqota mid la joogteeyo si ay u noqoto wax-qabad
Horumarineed oo waara.
Qoraa Yaasiin Daahir Cumar