Hargeysa (Dawan) Dhagax-dhigga ceel-biyoodka cusub ee magaalada Bali-kaliil ee Degmada Sabawanaag, Gobolka Maroodi-jeex oo uu khamiistii todobaadkan si rasmi ah u daah-furay Wasiirka Wasaaradda Horumarinta Biyaha Jamhuuriyadda Somaliland, Mudane Maxamed Cabdimaalik Axmed, ayaa ka tarjumaya dadaallada ay xukuumaddu ku bixinayso horumarinta adeegyada aasaasiga ah iyo gaadhsiinta bulshada biyo nadiif ah.
Mashruucan oo ay iska kaashanayaan Wasaaradda Horumarinta Biyaha iyo Hay’adda Oxfam ayaa la filayaa inuu si weyn u yareeyo baahida biyaha ee magaalada Bali-kaliil iyo deegaannada ku xeeran, isaga oo bulshada u horseedaya helitaan biyo oo joogto ah, caafimaad leh, isla markaana taageera horumarka deegaanka.
Ka qaybgalka masuuliyiinta kala duwan ee dowladda, xildhibaannada, madax-dhaqameedka iyo bulshada deegaanka ayaa muujinaya sida mashruucani u leeyahay muhiimad qaran iyo mid bulsho. Iskaashiga dowladda iyo hay’adaha horumarinta ayaa sidoo kale tusaale u ah sida wada-shaqayntu u dardargelin karto hirgelinta mashaariicda wax ku oolka ah.
Mashruucan ayaa ah mid wax weyn ka beddelaya nolosha bulshada Bali-kaliil, isla markaana xoojiya horumarka adeegyada biyaha ee gobolka. Waa tallaabo mudan in la dhiirrigeliyo, maadaama helitaanka biyo nadiif ahi uu yahay tiir muhiim u ah caafimaadka, wax-soo-saarka iyo koboca bulshada.