Kooxda Preston North End ayaa shaqada ka caydhisay tababare Paul Heckingbottom, kaddib markii kooxda ay wajahday natiijooyin liita oo is-daba joog ah, taas oo keentay inay kooxdu gasho kaalinta labaad ee ugu hoosaysa horyaalka Championship. Heckingbottom, oo kooxda loo magacaabay Agoosto 2024, ayaa Preston hoggaamiyey 109 kulan. Hase yeeshee, tan iyo bilowgii Janaayo waxa uu 27 kulan oo horyaalka ah ka gaaray shan guul oo keliya, taas oo sii kordhisay cadaadiska kaga imanayay maamulka iyo taageerayaasha kooxda.
Guuldarradii ugu dambaysay ayaa timid Sabtidii, markii Preston ay garoonkeeda Deepdale 1–0 kaga adkaatay Lincoln City. Guuldarradaasi waxay noqotay tii lixaad ee Preston kala kulanto toddobadii kulan ee horyaalka ee ay ciyaartay xilli ciyaareedkan, iyadoo taageerayaashuna ay ciyaarta kaddib ku muujiyey niyad-jab iyo caro, iyaga oo garoonka ka yeedhiyey foodh iyo qaylo.
Maamulka Preston ayaa sheegay in go’aanka lagu kala tagay Heckingbottom uu ka dhashay natiijooyinka aan wanaagsanayn ee kooxda, gaar ahaan intii lagu jiray 2026 iyo bilowga xilli ciyaareedkan. Kooxdu waxay sidoo kale xustay in maalgelin weyn lagu sameeyey ciyaartoyda, balse natiijooyinkii laga filayey aan la gaadhin.
Kooxdu waxay Heckingbottom uga mahadcelisay shaqadii iyo dadaalkii uu muddadii uu joogay kooxda geliyey, iyadoo u rajaysay mustaqbal wanaagsan. Si kastaba ha ahaatee, natiijooyinka liita ayaa ugu dambayn sababay in maamulka kooxdu go’aansado inuu beddelo hoggaanka farsamo.
Tababare-ku-xigeen Stuart McCall ayaa sidoo kale kooxda ka tegay, halka Jason Euell loo magacaabay inuu si ku-meel-gaadh ah u hoggaamiyo Preston. Euell ayaa kulankiisa ugu horreeya wajihi doona Sabtida, marka Preston ay booqanayso QPR, ka hor inta aan la gelin fasaxa saddexda toddobaad ah ee ciyaaraha xulalka.
Isbeddelka tababaraha ayaa imanaya xilli Preston ay ku jirto xaalad adag, iyadoo maamulka iyo taageerayaashu ay rajaynayaan in hoggaan cusub uu kooxda ka caawiyo inay soo ceshato guulaha, isla markaana ay ka soo baxdo qaybta hoose ee kala sarreynta Championship.