London(DAWAN):-Xisbiga mucaaridka ah ee WADDANI ayaa bilaabay dhaqanno qaran-dumisnimo ah oo aan ku habboonayn xisbi u tartamaya tallada wadanka, iyagoo dacwado ka dhan ah qaar ka mid ciidammada qalabka sida ee dalka u gudbiyay dawlado shisheeye oo Ingiriisku ka mid yahay.
Guddoomiye Ku xigeenka xisbiga WADDANI Axmed Muumin Seed oo booqasho ku jooga Ingiriiska, ayaa kulan la yeeshay xildhibaan Clive Betts oo ka mid ah xildhibaanada baarlamaanka dawlada Ingiriiska ee laga soo doortay magaalada Sheffeild, waxaanu u gudbiyay dacwado uu ka siday Guddoomiye Cirro oo ku wajahnaa ciidanka RRU-da oo ay ku eedeeyeen in loo adeegsado hanaan dimuqraadiyada wax u dhimaya.
Waxa kale oo Guddoomiye Cirro uu u diray xildhibaanno ka tirsan Baarlamaanka Ingiriiska waraaqo xambaarsan dacwado la xidhiidha eedo been abuur ah oo uu Guurtida ku maso-bidayo inay ku hawlan yihiin muddo kordhin loo sameeyo xukuumadda Madaxweyne Siilaanyo haddii ay doorashooyinku dib u dhacaan badhtamaha kal-dambe. Waxa kale oo Hoggaanka WADDANI ay olole ugu jiraan inay shaambad xun ku dhuftaan ciidanka RRU-da oo ka mid ah ciidamadda dalka ee loogu tallo galay amaanka iyo la dagaalanka argagixisada.
Qoraal WADDANI ka soo saaray ashakatada ay gaadh siiyeen xildhibaan ka tirsan Baarlamaanka Ingiriiska, ayaa lagu yidhi “Guddoomiye ku xigeenka xisbiga mucaaradka ah ee WADDANI Md. Axmed Muumin Seed oo ay wahelinayso agaasimaha xarunta dhexe ee xisbigaas Marwo Yaasmiin Cali Raygal, ayaa kulan la qaatay xildhibaan Clive Betts oo ka mid ah xildhibaanada baarlamaanka dawlada Ingiriiska uga soo baxay magaalada Sheffeild.
Mr. Seed kulankan uu la qaatay xildhibaanka waxaa ay si xoog ah ugala hadleen ciidamada RRU-da oo ay warbixintooda ugu sheegeen in loo adeegsado sifo aan ahayn tii loo abuuray, waxaana ay carabka ku dhufteen in loo adeegsado xadhiga dadka shicibka ah, xildhibaanada dhaliila hanaanka ay u socoto xukuumada jirta, iyo sida oo kale dadka magaca ku dhex leh bulshada Somaliland.”
“Waxaa kale oo ay kala hadleen arrimo khuseeya dhinaca doorashooyinka iyo sidii ay wakhtigii loogu tallo galay ugu qabsoomi lahaayeen, waxaana ay sheegeen in hada ay walaac xoogan ka qabaan in ay guurtidu ay doonayso sidii ay muddo kordhin ay ugu samayn lahayd xukuumada hada jirta.
Dhanka kale xildhibaan Clive Bettsoo ka tirsan baarlamaanka Ingiriiska ayaa uga mahad celiyey guddoomiye WADDANI warbixinta buuxda ee uu ka siiyey xaalada guud ee dalka, waxaana u halkaasi balan qaad ugu sameeyeen in daba-gal uu ku samayn doonaan sababta ciidanka RRU-da ee lagu bixiyo cashuurta Ingiriiska loogu adeegsado sifo ka baxsan shaqadii loo abuuray,”ayaa lagu sheegay war-saxaafadeedka xisbiga WADDANI.
Tallaabadani waa mid dheg-xumo iyo fadeexad hor leh ku ah Guddoomiye Cirro oo mucaaridadiisu ay marayso inuu ciidammadda wadanka kala qeyb-qeybiyo oo uu sumcad xumo aanay ka mutaysan uu ka faafinayo.
Dawannews Hargeysa office
