Guddoomiyaha KULMIYE Oo Sheegay In Aanay Qaabili Doonin Musharaxiin Beello u Soo Gudbiyaan
Hargeysa (DAWAN)- Guddoomiyaha xisbul xaakimka KULMIYE Md. Muuse Biixi Cabdi, ayaa sheegay inaanay xisbi ahaan aqbali doonin beel qof murrashax ah u soo gudbisa xisbigaas, xiligan oo uu tilmaamay in aanay dhawayn doorashooyinkiiba.
Guddoomiye Muuse Biixi waxa uu sheegay in murrashaxiintu ay is sharixi karaan uun marka Komishanka doorashooyinka qaranku ay iclaamiyaan wakhtiga doorashooyinka la qabanayo.
“Waxaanu sheegaynaa Ma qaabilayno oo naloo keeni karo Murrashaxiinta is sharaxaya ee beeluhu sharaxayaan, waayo xiligan ma dhowa doorashooyinkii, waxa la is sharixi karaa uun marka Komishanka doorashooyinka qaranku ay mudeeyaan wakhtiga doorashadda,”ayuu yidhi Guddoomiyaha xisbiga KULMIYE oo khamiistii ka hadlayay shirweynihii shanaad ee ururka suxufiyiinta Somaliland ee SOLJA.
Hadalka Guddoomiyaha KULMIYE ayaa ku soo beegmay xili ay dad aad u badani ay daboolka ka qaadeen inay u tartamayaan doorashada Goleyaasha Wakiiladda, kuwaasi oo beryahanba magaalooyinka waaweyn ee dalka ku qabsanayay xaflado la soo qadamay oo sharciga baal-marsan.