Hargaysa(Dawan):Wefti balaadhan oo ka socda dalala isku taga Imaaraadka Carabta, ayaa shalay socdaal ku yimid caasimadda dalka ee Hargaysa.kaasi oo ay u jeedadoodu tahay sidii ay u dhamaysiri lahaayeen mashruuca biyo-soor saarka ee Xunbo-weyne.
Weftigaasi oo uu hoggaaminayo madaxa Hay’addaasi Khaliifa Foundation u qaabilsan Mashaariicda bani-aadamimada ee dalalka Afrika ama kuwa Saxaraha ka hooseeya, Sheekh Falaax Al-axbaabi abu Suldaan, ayaa waxa caasimada Hargeysa ku soo dhaweeyey masuuliyiin ka mid ah xukuumadda Somaliland, kuwaasi oo uu ka mid yahay wasiirka Khayraadka biyaha Md. Xuseen Axmed Cabdulle.
Wasiirka biyaha oo halkaasi ka hadlay ayaa faahfaahiyey ujeeddada safarka ay dalka ku yimaaddeen Weftigan ka socda dawladda Imaaraadka Carabta, ayaa sheegay inay u socdaan sidii loo furi lahaa mashruuca biyaha ee XUMBO-WEYNE, kaasi oo loogu talo-galay inuu waraabiyo shacabka caasimadda Hargeysa ee bariga, Koonfurta iyo waqooyiga caasimadda, kuwaasi oo aan hore u heli jirin biyo.
Waxaanu yidhi “Weftigani waxay u socdaan mashruucii aynu mudadda badan sugaynay ee waxoogaa fadhiidka noqday oo aanu doonayno maalinta Axda ee todobaadkan in la dhagax dhigo. Waxaan shacabka reer Hargeysa ugu bushaareynayaa in mashruucii aad inta badan lahaydeen maxaa ku dhacay (XUMBO-WEYE) inay howlihii u soo dhamaadeen, kana soo dhamaadeen wixii hay’adda Imaaraadka ee (Khaliifa Foundation) ku xidhnaa, xagayagana diyaar ayaanu ka dhignay”.
Waxa kale oo uu sheegay wasiirku in ka wasaarad ahaan daraasad ay ku sameeyeen ceelasha biyo soo saarka ee Xumbo-weyne ay ku ogaadeen cadadka biyaha ee ku jra.
Waxaanu yidhi “Ceelashii biyaha oo aanu ogaanay Cadadka ku jira, waxaanuna sugeynaa wixii maanta ka danbeeya sidii biyuhu u bilaabmi lahaayeen”.
Dhinaca kale Madaxa Hay’adda Khaliifa Foundation u qaabilsan Mashaariicda bani-aadamimada Sheekh Falaax Al-axbaabi abu Suldaan oo hogaaminaya weftiga ka socda Imaaraadka oo isna halkaasi ka hadlay ayaa sheegay inuu ku faraxsan yahay inuu yimaaddo dalka Somaliland.
Waxaanu tilmaamay in mashruuca biyaha ee Xumbo-Weyne uu yahay deeq ay dadka Somaliland ugu tallo-galeen boqorka dalka Imaaraadka iyo labadii hoggaamiye ee dalkaasi uga horeeyey, sidaas daraadeedna ay Hargeysa u yimaaddeen sidii loo dhamaystiri lahaa mashruuca biyo soo saarka ee Xumbo-weyne.
By: Cabdi M.Safwaan
Dawannews Hargeysa office
