Maansadan la magac baxday Gobanimadda Hodanka ah, waxaa curiyay oo ay maskaxdiisa iyo maankiisa ka soo maaxatay abwaanka da’ada-yar ee C/naasir Cabdi Yaasiin, ahna macalin wax ka dhiga dugsiyadda ku yaalla caasimadda Hargaysa taariikhdu markii ay ahayd 06/03/2015.
Maansadani oo si qoto dheer uga hadlaysa qiimaha ay leedahay gobanimadu, waxaa ku dhaliyay abwaanka sida uu sheegay ka dib markii ay weftigii ka socday jamhuuriyadda Somaliland ee uga qayb gelayay wadahadaladii burburay ee dalka Turkiga ee u dhexeeyay dawladda Xamar iyo Somaliland.
Waxaanay weftigii metelayay Somaliland qaadaceen in ay shirkaasi hor fadhiistaan calooshood u shaqaysteyaal dhalasho ahaan ka soo jeedda Somaliland balse u shaqo tegay maamulka Muqdisho, iyadoo arrintaasina ay ahayd mid ay dawladda Soomaaliya ku jabisay qodobo hore loogu heshiiyay. Hadaba maansadani Gobanimadda Hodanka ah ayaa abwaanka C/naasir waxa uu ku iftiiminayaa qaranimadda Somaliland iyo halgankii dheeraa ee loo soo maray iyo hanaanka dawladnimo ee ay Somaliland ku talaabsatay halgankaasi ka dib, isagoo dhinaca kaleena abwaanku ku hogotusaalayna maansadani go’aankii geesinimadda ahaa ee ay ergadii Somaliland ku qaadaceen shirkii Turkiga ee burburay. Maansadu waxay ku bilaabanaysaa sidan:
Gobanimadda hodanka ah
Ilayn hawl yaraan
Ku ma aynu haabane
Hanadaynu ku weynay.
Halyeeyadii iyo maaliyo
Dhiigooda u huray
Dhulkeena hooyo
Mahad baan u haynaa.
Midawgaan ku hungawnay
Haydaaraduu lahaa
Mid aan hilmaamayno
Habeen qudha maaha.
Halgamaa aqoontiyo
Caqliga haboon
Rabi u hibeeyaa
Hogaansha dalkayga
Hillinkii dadkaygu
Dalkooda ku hanteen
Hal weeye duruus
Hubaal laga dheehdaa
Habka dawladnimo
Siduu ku hanaqaaday
Hanaan weeye dadkaygu
Hamigooda ku gaadheen
Somaliland heedhe
Waa hoyga sinaanta
Waa meel ku hodana
Hufnaantiyo nabada
Halgamaa aqoontiyo
Caqliga haboon
Rabi u hibeeyaa
Hogaansha dalkayga
Dhamaad……..
Abwaan C/naasir Cabdi Yaasiin…
