Hargaysa (Dawan): Roobabka gu’ga ayaa maalmahan si weyn uga curtay deegaamo ka tirsan Somaliland, iyadoo roobab lagu qabowsaday ka da’een gobolo ay ka jirtay abaar iyo biyo la’aan.
Waxaanay wararku sheegayaan in dhamaanba deegaamadaasi roobku wada gaadhay inkasta oo uu ku kala badan yahay, hase yeeshee taasi ay meesha ka saartay biyo la’aantii ka taagnayd meelo ka tirsan gobolada dalka gaar ahaana galbeedka Somaliland.
Roob mahiigaan ah ayaa shalay duhurnimadii si weyn u maasheeyay gobolka Maroodi Jeex iyo nawaaxigiisa gaar ahaana caasimadda Hargeysa. roobkaasi oo bilaabay duhurnimadii ayaa da’ayay ku dhawaad muddo saacad ah, kaasi oo aan wax dabaylo ah wadan, laakiin ahaa mid dhibcihiisu ay aad u xooganaayeen ayaa kala xidhay isku socodka magaaladda intii uu da’ayay.
Sidoo kale Roobkaasi oo ahaa ka ay Soomaalidu u taqaano Mayayga ee da’a xiliga maalinta ah, isla markaan aan wax dabaylo ah keenin oo dul-ka-hoor ahaa, ayay ka dhasheen biyo xoog badan oo markii uu joogsaday ka soo rogmaday xaafadaha caasimadda, kuwaasi oo kala xidhay isku socodka magaaladda iyadoo ay jidadka mara badhtamaha caasimadda baabuurtu isku xanibmeen, ayna adkaatay in la isku gudbo wadooyinka oo ay biyaha daadku xidheen awgeed.
Daadad aad u badan oo ka dhashay roobakaasi ayaa sababay in ay biyuhu ka soo fataheen ililadaha ama meelaha biyo –mareen ka ah, taasi oo keentay in biyuhu ay jibaaxeen wadooyinka, waxaana jirtay in biyuhu ay galeen meherado ganacsi oo wadooyinka hareeraheeda ku yaalla iyo cooshadaha yar yar sida kabadhada Qaadka lagu iibiyo iyo meelo kale.
Fatahaadda ka dhalay daadadka ayaa waxa sababtay biyaha roobka oo aad u badnaa kana awood batay meelaha loogu tallogalay inay biyuhu maraan iyo sidoo kale meelaha iliiladaha biyo-mareenka ah oo uu xidhay xashiish aad u badan oo tuulmay iyo qashin faro badan oo biyaha roobku soo saareen.
Inkasta aan la soo sheegin wax khasare nafeed mid dad iyo mid duunyo iyo hanta kale oo uu roobku waxyeelo u gaystay, ayaa hadana sida inta badan dhacda xiliyadda ay roobabaku da’aan waxaa jirtay in wadooyinka dhex mara faras magaalaha caasimadda in ay isku xanibmeen gaadiidku,isla markaana uu jiray cidhiidhi badan oo arrintaasi ay keenat, taasi oo ka dhalatay Dhagaxaan waaweyn, Ciid, xashiish iyo qashin kale oo baco iyo caagado u badan oo ay biyaha daadadku ku xidheen qaar ka mid wadooyinka.
Isku socodka dhinaca baabuurta ayaa laga dareemayay in culays badani uu ku yimid ilaa habeenimadii xalay, iyadoo si weyn looga dareemay wadooyinka ay qashinka iyo ciidu xidheen. Waxaana la arkayay in wadooyinka qaarkood uu dhagaxaan aad u waaweyn ku xidhay roobku.
Si kastaba ha ahaatee ma aha wax ku cusub bulshadda ku nool caasimadda Hargaysa in sidan oo kale ay biyo ugu fatahaan meheraddo ganacsi xiliyadda roobku curto, ama in meelaha biyo mareenadda ah ay u xidhmaan qashin buux-dhaafiyay, taasi oo ay joogto noqotay dhibaatadeedu in ay dhacdo xili roobaadka.
Waxaana la rumaysan yahay in arrintani ay sabab u tahay dawladda hoose ee caasimadda oo aan weli ku guulaysan in ay samayso meelo ay biyuhu maraan iyo sidoo kale in marka ay roobabku curtaan ay iliiladaha biyaha ka sifeeyaan qashinka xidhay.
By: Khadar Cabdi Muuse
Dawannews Hargeysa office
